ShQO-da 1 mln gektardan astam jer memleket menshigine qaıtaryldy

ÓSKEMEN. QazAqparat – Shyǵys Qazaqstan oblysynda paıdalanylmaǵan 1 mln 32 myń gektar jer memleket menshigine qaıtarylǵan, dep habarlaıdy QazAqparat tilshisi.

Óńirde aýyl sharýashylyǵy jerlerin paıdalanýdyń tıimdiligin baqylaý men monıtorıngti kúsheıtý maqsatynda birqatar jumystar atqarylýda. Bul jaıly ShQO Aqparat ortalyǵynda ótken baspasóz brıfıngi barysynda oblystyq jerdiń paıdalanylýy men qorǵalýyn baqylaý basqarmasynyń basshysy Seısenǵazy Chýkaev málimdedi.

«2015-2019 jyldar aralyǵynda paıdalanylmaǵan nemese tıisti zańnamany buzý arqyly paıdalanylǵan 1 mln 554 myń gektar aýyl sharýashylyǵy jerleri anyqtaldy. Onyń ishinde 1 mln 32 myń gektar memleket menshigine qaıtarylǵan. 908,5 myń gektar jer aýyl sharýashylyǵy aınalymyna tartyldy. 214,2 myń gektar jerdiń ıeleri qazirgi ýaqytta jerdi paıdalanýǵa kirisip ketken. 307,5 myń gektarǵa qatysty materıaldar áli de memlekettik organdardyń qaraýynda», - deıdi ol.

Basqarma basshysynyń aıtýynsha, jyl basynan beri 65 tekserý júrgizilip, sonyń nátıjesinde jer zańnamasyn buzýdyń 50 faktisi anyqtalǵan. Zańbuzýshylyqqa jol bergenderge jalpy somasy 1,6 mln teńge mólsherinde aıyppul salyndy.