ShQO-da 1 mıllıon gektardan astam alqapqa egin egiledi
Bıyl ShQO-da 1,3 mln gektar jerge egis egiledi, bul ótken jylmen salystyrǵanda 6,8 myń gektarǵa artyq.
«Jazdyq egis kólemi 1 mln 98 myń gektarǵa jetedi. Óńirde negizi dándi, dándi-burshaqty daqyldardy – 559,3 myń (jalpy alańnyń 41%) jáne maıly daqyldar 481 myń gektarǵa (35,1%) egiledi. Maıly daqyldardyń úlesinde dástúrli kúnbaǵys basym, onyń kólemi – 445 myń gektardan asady. Budan basqa, egis alqabynyń 292 myń gektaryna jem-shóp egiledi. Sondaı-aq, 19 myń gektarǵa kartop, 16 myń gektarǵa kókónis pen baqsha salynady. Bul ShQO-daǵy barlyq egis alqabynyń 2,5%», delingen habarlamada.
Kóktemgi egis jumysyna 16,6 myń traktor, 5 myńnan astam júk kóligi, 93 egis kesheni, 11 myńnan astam tuqym sepkish, soqa men kýltıvator jumyldyrylady. Traktorlardyń 98%, qalǵan tehnıka 100% ázir.
«Kóktemgi egis jumysyna 2,5 myńnan astam iri jáne orta sharýashylyq jumyldyrylǵan. Egis jumystaryn júrgizý úshin Pavlodar MHZ-dan 30 myń tonna dızel otyny bólindi. Naýryz aıyna 8 myń tonna, sáýir aıyna 9 myń tonna, mamyr aıyna 8 myń tonna, maýsym aıyna 5 myń tonna belgilendi. Qala men aýdan ákimdikterimen olardy jetkizý jónindegi operatorlar anyqtaldy.
Bıyl oblystyq bıýdjetten sýbsıdııa túrinde 5,4 mlrd teńge bólindi. Onyń ishinde tuqym sharýashylyǵyn qoldaýǵa – 2,7 mlrd teńge, mıneraldy tyńaıtqyshtardyń qunyn arzandatýǵa – 1,7 mlrd teńge, pestıtsıdterdi arzandatýǵa – 1,4 mlrd teńge qarastyrylǵan», delingen habarlamada.
Sonymen qatar, «Agrarlyq nesıe korporatsııasy» AQ arqyly egis naýqanyn qosymsha qarjylandyrý úshin fermerlerge 2,4 mlrd teńgeden astam tómen paıyzdy nesıe berilgen.
Qazirgi ýaqytta Shyǵys Qazaqstan oblysynda egis alqaptaryn óńdeý jáne ylǵaldy jabý jumystary júrgizilip jatyr. Úrjar, Zaısan jáne Tarbaǵataı aýdandarynda qazirdiń ózinde dándi daqyldar egildi.