ShQO-da 1 qyrkúıekte 100 myńǵa jýyq bala mektepke barady

ÓSKEMEN. KAZINFORM — Shyǵys Qazaqstan oblysyndaǵy 347 mektepke jańa oqý jylyn 99 myń bala bastaıdy. 

Onyń ishindegi 8664 bala 1-synypqa qabyldanǵan. Bul týraly ShQO Bilim basqarmasynan málim etti.

— «Keleshek mektepteri» ulttyq jobasy aıasynda óńirde 3000 orynǵa arnalǵan jeti mektep salynyp jatyr. Búginde 6 mektep paıdalanýǵa berilip, 1 qyrkúıekten ashylady. Sonymen qatar Bilim ınfraqurylymyn qoldaý qorynyń qarajaty esebinen Zaısan qalasynda jáne oblystyq bıýdjet qarajaty esebinen Altaı aýdany Jańa Buqtyrma kentinde jańa mektep salyndy, — delingen aqparatta.

«1300 mektepti renovatsııalaý» jobasy aıasynda oblysta 2027 jylǵa deıin 21 mektepti jańartý josparlanǵan. Bıyl bes mektepte, atap aıtqanda Shemonaıha aýdanyndaǵy A.Baıtursynuly atyndaǵy orta mektep, Samar aýdanyndaǵy № 1 Samar orta mektebi, Óskemen qalasyndaǵy L. N. Gýmılev atyndaǵy № 38 gımnazııa, Tarbaǵataı aýdanyndaǵy Qoıǵan orta mektebi jáne Rıdder qalasyndaǵy № 14 orta mektepke jóndeý jumystary júrgizilip jatyr.

Sonymen qatar shaǵyn qalalarda, aýdan ortalyqtarynda jáne aýyldarda 50 mektepti jyl sońyna deıin jańǵyrtý kózdelgen.

— Jalpy bilim beretin mektepterdiń materıaldyq-tehnıkalyq bazasyn jaqsartý maqsatynda bıyl hımııa, fızıka, bıologııa, STEM jáne robototehnıka baǵytyndaǵy 40 pándik kabınet jabdyqtalady. 103 bilim ordasynda 4,5 myń oqýshyny mektepke tasymaldaý uıymdastyrylǵan. Ol úshin 127 mektep avtobýsy tartylǵan, — delingen habarlamada.

Eske salsaq, osyǵan deıin ShQO Bilim basqarmasyna jańa basshy taǵaıyndalǵany habarlanǵan.