ShQO-da 1,7 myń gektarǵa egilgen kúzdik bıdaı úsip ketken
ÓSKEMEN. QazAqparat - Bıylǵy qarsyz qys Shyǵys Qazaqstan boıynsha 1,7 myń gektarǵa egilgen kúzdik bıdaıdy tolyǵymen úsitip jibergen. Bul týraly oblys ákimdiginiń májilisinde belgili boldy, dep habarlaıdy QazAqparat tilshisi.
Oblystyq aýyl sharýashylyǵy basqarmasynyń basshysy Asqar Jaqypbaev qys boıy qardyń az túsýi dıqandarǵa soqqy bolyp tıgenin aıtty. Qardyń juqalyǵy alqaptarǵa 1 metrden astam toń túsýine túrtki bolǵan. Osylaısha kúzde egilgen daqyldyń 5,4 paıyzy jaramsyz kúıge túsken.
«Byltyr kúzde 31,3 myń gektar alqapqa kúzdik daqyldar egilgen bolatyn. Sonyń 1700 gektary túgeldeı úsip ketken. Taǵy 5200 gektar alqaptyń jaǵdaıy nashar, 22,9 myń gektardyń jaǵdaıyn qanaǵattanarlyq dep baǵalap otyrmyz. Tek 1,5 myń gektar kúzdik daqyldyń qıyndyqsyz ónetinine senimdimiz» - dedi Asqar Jaqypbaev.
Jalpy Shyǵys Qazaqstan boıynsha bıyl 1,357 mln gektar jerge egin egilmek. Bul byltyrǵydan 40,9 myń gektarǵa kóp.
