ShQO búrkitshisi halyqaralyq baıqaýda top jardy
ÓSKEMEN. QazAqparat - Almatyda ótken «Sonar 2018» halyqaralyq búrkitshiler baıqaýynda shyǵysqazaqstandyq qusbegi birinshi oryn ıelendi, dep habarlaıdy QazAqparat tilshisi.
Almatyǵa Altaıdan bir top bolyp barǵan oblystyń búrkitshileri Azııa chempıonatynan da júldeli oralyp otyr.
Aıta ketsek, «Sonar 2018» baıqaýyna álemniń onnan astam elinen 90 búrkit qatysqan. Úrjarlyq Ómirbek Nuǵymulynyń «Muzbalaǵy» sol toqsannyń ishinen top jardy.
«Bizdiń oblystan tórt búrkit qatysty. Azııa birinshiliginde bas júldeni qyrǵyzdar áketse, halyqaralyq baıqaýda bizdiń mereıimiz ústem boldy. Azııa birinshiliginde bizdiń bir búrkitimiz tórtinshi jáne toǵyzynshy oryn aldy» - deıdi Shyǵys-Altaı búrkitshiler federatsııasynyń prezıdent Táttimbek Kápuly.
Halyqaralyq saıys «erkin ushyrý», «shyrǵaǵa salý», «qoıanǵa salý», «túlkige salý» syndy kezeńderdi qamtyǵan. Ómirbek Nuǵymulynyń qyranynan bólek Táttimbek Kápulynyń búrkiti úzdik ondyqty túıindese, Erzat Baıqadamov pen Ermek Jetpisov baptaǵan muzbalaqtar shırek fınalǵa deıin jetken.
