ShQO blokposttaryna volonterler jumyldyryldy

ÓSKEMEN. QazAqparat – Shyǵys Qazaqstan oblysynda volonterler blokposttardaǵy tártip saqshylarymen birge turǵyndarǵa tótenshe jaǵdaı kezindegi shekteýler týraly túsindirýde, dep habarlaıdy QazAqparat.

ShQO Polıtsııa departamenti baspasóz qyzmetiniń málimetine súıensek, shara barysynda eriktiler maskalarmen, qolǵaptarmen, qorǵanys kostıýmderimen jáne antıseptıktermen qamtamasyz etilgen. Túsindirý jumystarynyń maqsaty – TJ kezinde qoǵamdyq tártipti jáne azamattardyń qaýipsizdigin saqtaý.

«Osyndaı sátte volonterler qozǵalysynyń mańyzy zor. Tártip saqshylarymen birlesken belsendi jastar Óskemen qalasyndaǵy blokposttarda dúıim jurtqa tótenshe jaǵdaı barysynda engizilgen qosymsha shekteýler týraly jiti túsindirip, qoıylǵan saýaldarǵa tolyqqandy jaýap berýde. Sonymen qatar turǵyndarǵa jeke bas gıgıenasyn qatań saqtaý qajettigi jaıly aıtylýda», - delingen vedomstvo málimetinde.

Budan bólek, volonterler júrgizýshilerge koronavırýs ınfektsııasynan saqtanýdyń joldary kórsetilgen jadynama taratty.

Esterińizge sala ketsek, osyǵan deıin óskemendik volonterlerdiń blokposttaǵy qyzmetkerlerge shaı men baýyrsaq taratqany habarlanǵan bolatyn.