ShQO: Bıyl Alakólge baratyn týrıster Úrjarǵa ushaqpen jete almaıdy
19 sáýirden bastap áýejaı aýqymdy rekonstrýktsııalaý jumystaryn júrgizý maqsatynda jabylady. Al Alakólge baratyn týrıster úshin temirjol jáne avtobýs reısteriniń sany kóbeıtilmek.
Aımaq basshysy Danıal Ahmetov Úrjar aýdanyna jasaǵan jumys sapary barysynda áýe aılaǵyndaǵy jóndeý jumystarymen tanysty. Qazir ushý-qoný jolaǵyn rekonstrýktsııalaýmen bul baǵytta jumys tájirıbesi bar kompanııa aınalysýda. Onyń aldyndaǵy merdiger ózine júktelgen mindetterdi durys oryndamaǵan bolatyn.
Áýe qatynasyn úzbeý úshin ýaqytsha qoný jolaǵyn salý usynyldy. Alaıda onyń quny 5,6 mıllıard teńgeni qurap otyr. Bul qarajat qoldanystaǵy jolaqty jóndeýge jumsalyp otyrǵan somadan 1 mıllıard teńgege qymbat. Osy rette oblys ákimi memlekettik bıýdjetten artyq shyǵyndy boldyrmaý qajettigin jetkizdi.
«Dúısenbiden bastap áýejaı jabylady. Qurylys jumystary 3 aýysymda júrgiziledi. Nysan meniń jeke baqylaýymda. Eki aptadan keıin osynda taǵy kelip, qurylystyń qalaı júrip jatqanyn tekseremin», - dedi Danıal Ahmetov.
