ShQO: Bıyl Alakól ınfraqurylymyna 8 mlrd teńgege jýyq qarajat baǵyttaldy
ShQO Týrızm jáne syrtqy baılanystar basqarmasynyń basshysy Marat Qabaqovtyń aıtýynsha, sońǵy 30 jylda oblystyń týrızm salasyn damytý boıynsha kezeń-kezeńmen keshendi jumys júrgizilgen. «Katonqaraǵaı» memlekettik ulttyq tabıǵı parki, Batys Altaı, Marqakól qoryqtary, Muztaý, Ýkok ústirti, Buqtyrma sý qoımasy jáne basqa da kóptegen tarıhı jáne mádenı eskertkishterge baı ólke ár týrıstti san qyrymen qyzyqtyra alady. Sonyń arqasynda óńirdiń týrıstik áleýetine sheteldikterdiń qyzyǵýshylyǵy artqan.
«Bıyl Rıdderdiń týrıstik obektilerine elektr jelisi tartyldy. Jobanyń quny 40 mıllıon teńgeni qurady. Osyndaı joba Zaısan aýdanynda da júzege asyrylýda. Katonqaraǵaıda ekologııalyq jáne etnotýrızm damyp keledi. Munda jeke kásipkerler men jergilikti turǵyndarǵa qonaq úıler jelisin ashýǵa qoldaý kórsetilýde. Olar úshin granttar qarastyrylǵan. Bul baǵytta qazirdiń ózinde 15 bıznes-joba júzege asyrylǵan», - dedi ol.
Alakól demalys orny – respýblıkadaǵy eń negizgi týrıstik nysandardyń biri. Eldiń týrıstıfıkatsııa kartasynyń top-10 obektisiniń qataryna kirip otyr.
Onda sońǵy jyldary kezeń-kezeńmen, keshendi jumys júrgizildi. Demalys bazalarynyń turmystyq jáne sanıtarlyq jaǵdaılaryn, órt qaýipsizdigin saqtaý turǵysynan monıtorıng júrgizetin jumys toby quryldy.
Alakóldiń ınfraqurylymyn jaqsartýǵa 2016-2019 jyldary oblystyq bıýdjetten shamamen 6,1 mlrd teńge bólindi. Jaǵalaý abattandyrylyp, Úrjar aýdanyndaǵy jolǵa jóndeý jumystary júrgizildi. Temirjol tasymaly men áýe qatynasyn sýbsıdııalaý, sondaı-aq jyldamdyǵy joǵary ınternet jelisin ornatý jáne basqa da josparly is-sharalar atqarylǵan.
«Koronavırýs pandemııasy bastalǵan sátten bastap týrızm eń zardap shekken salalardyń biri boldy. 2020 jyly óńirge keletin týrıster sany eki ese azaıdy (42 %). Alakól jaǵalaýynda demalýshylar sany 70 paıyzǵa tómendedi», - dedi Marat Qabaqov.
Onyń aıtýynsha, bıyl Alakóldiń shyǵys jaǵalaýynyń ınfraqurylymyn damytýǵa 8 mıllıard teńgege jýyq qarajat baǵyttaldy. Barlyq jobalar iske asyrylǵan. Atap aıtqanda, polıtsııa beketteri men jedel medıtsınalyq járdem stantsııalary salyndy.
