ShQO birneshe aýylynda halyq tutynatyn aýyzsýdyń talapqa saı kelmeıtini anyqtaldy

ÓSKEMEN. QazAqparat – Shyǵys Qazaqstan oblysyndaǵy birneshe aýylda halyq tutynatyn aýyzsýdyń talapqa sáıkes kelmeıtini anyqtaldy, dep habarlaıdy QazAqparat tilshisi.

ShQO sanıtarlyq-epıdemıologııalyq baqylaý departamenti baspasóz qyzmetiniń málimetine súıensek, jyl basynan beri mamandar óńirdiń túkpir-túkpirinen 216 aýyzsý synamasyn alǵan.

«Sonyń nátıjesinde keıbir aýyldardaǵy aýyzsýdyń sapasyzdyǵy anyqtalyp otyr. Óskemen irgesindegi Shyǵys jáne Samsonovka aýyldarynda, Shemonaıha aýdanyndaǵy Kandykovka, Krıýkovka jáne Novo-Ilınka aýylyndaǵy sý jelilerinen alynǵan synamadaǵy sýdyń mıkrobıologııalyq kórsetkishteri talapqa sáıkes kelmeıtin bolyp shyqty», - delingen aqparatta.

Synamalardyń talapqa saı kelmeýine qar erý kezeńindegi jerasty sýynyń kóterilýi jáne qarǵyn sýdyń qudyqtarǵa tolýy sebep bolýy múmkin.

Qazirgi ýaqytta quzyrly mekemeler profılaktıkalyq sharalardy qolǵa aldy.

Atap aıtqanda, jeliler dezınfektsııalanyp, jýylyp tazalanyp jatyr.