ShQO birneshe aýdanynda alapat órtpen kúres jalǵasyp jatyr
ÓSKEMEN. QazAqparat – Shyǵys Qazaqstan oblysynyń birneshe aýdanynda iri dala órtimen kúres jalǵasyp jatyr, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, Kúrshim aýdanynda dala órtiniń aýmaǵy 1300 gektardy qurap otyr.
Jaqyn ornalasqan eldi mekenderge tónip turǵan qaýip joq.
Órtti sóndirýge barlyǵy 270-ke jýyq adam men 34 tehnıka jumyldyrylǵan.
«Altaı aýdany «Zyrıan» orman sharýashylyǵy jáne «Bykov» ormanshylyǵyn sharpyǵan qyzyl jalynnyń jalpy aýdany 800 gektarǵa jetip otyr. Sýaǵar qurylǵysy bar MI-8 tikushaǵy tartylǵan. Áýeden 12 tonnadan astam sý tógildi. Búgin órt ornyna QR Qorǵanys mınıstrliginiń MI-17 tikushaǵy men Semeı qalasyndaǵy №68303 áskerı bóliminiń qyzmetkerleri kómekke kelmek», - delingen aqparatta.
Budan bólek, Katonqaraǵaı aýdany Altynbel aýylynan 12 shaqyrym jerde «Úlken naryn» orman sharýashylyǵynda buta men shóp janyp jatyr. Aldyn ala derek boıynsha ottyń jalpy aýdany – 1200 gektar. Tilsiz jaýmen kúreske 280-nen astam adam men 24 tehnıka tartyldy. Órt ornynda jedel shtab quryldy.
Eske salsaq, Altaı aýdanynda 2 qyrkúıek kúni shyqqan dala órti 700 gektarǵa jaıylyp ketti.
Kúrshim aýdanyndaǵy iri dala órtiniń de beti qaıtpaı jatyr.
Shyǵys Qazaqstan oblysynyń ákimi Danıal Ahmetov iri dala órtteri shyqqan aýdandarǵa baryp halyqty evakýatsııalaý qajet emestigin aıtqan.
