ShQO balabaqshalarynda kúnine eki ret dezınfektsııa júrgiziledi

ÓSKEMEN. QazAqparat – ShQO bilim basqarmasynyń basshysy Saırangúl Jumadilova bilim berý salasynda koronavırýstyń aldyn alý maqsatynda qandaı sharalar atqarylyp jatqanyn aıtyp berdi, dep habarlaıdy QazAqparat.

Qazirgi ýaqytta óńirdegi barlyq mektepke deıingi mekemeler qalypty rejımde jumys isteýde. Biraq búldirshinderdi balabaqshaǵa aparý-aparmaý ata-analardyń óz quqyǵynda. Osy rette, Saırangúl Jumadilova múmkindik bolsa balalardyń úıde otyrǵandary durys ekendigin aıtty.

«16 naýryzdan bastap oblystyń barlyq mektep oqýshylary kanıkýlǵa shyqty. Al kolledjder men ýnıversıtetter qashyqtyqtan oqytýǵa kóshken. Muǵalimder de túgeldeı qashyqtan jumys isteýde. Olarǵa aılyqtary burynǵydaı tólenedi. Mektepterdegi kanıkýl bitkennen keıin, qajet bolǵan jaǵdaıda qashyqtyqtan oqytý tehnologııalary qoldanyla otyryp, bilim alý úshin jaǵdaılar jasalmaq», - deıdi ol.

Budan bólek, qosymsha bilim berý uıymdary, oqýshylar saraıy, mýzyka jáne óner mektepteri jumysyn toqtatty. Barlyq josparlanǵan sporttyq saıystar keıinge shegerilgen.

«Bilim berý mekemeleri jumysqa qajetti nusqaýlyqty aldy. Balabaqshalarda kúnine eki ret dezınfektsııa júrgizilýde. Barlyq jerde baqylaý kúsheıtilgen», - deıdi basqarma basshysy.