ShQO: Baqylaýǵa alynǵan azamattardyń birde-bireýinde koronavırýs joq
ÓSKEMEN. QazAqparat – QR Bas memlekettik sanıtarlyq dárigeriniń 2020 jylǵy 20 aqpandaǵy qaýlysyna oraı Shyǵys Qazaqstan oblysynda Qytaı Halyq Respýblıkasynan kelgen barlyq Qazaqstan azamattary 14 kún merzimge oqshaýlandy, dep habarlaıly QazAqparat ShQO densaýlyq saqtaý basqarmasyna silteme jasap.
Koronavırýsqa qarsy is-áreket etý maqsatynda Shyǵys Qazaqstan oblysynyń turǵyndary úshin arnaıy oqshaýlanǵan medıtsınalyq statsıonarlar qarastyrylǵan.
QHR-dan oblys aýmaǵyna qaıtyp keletin árbir Qazaqstan azamatyn shekarada medıtsına qyzmetkerleri tekseredi. Eger jótel, tumaý, dene qyzýy jáne koronavırýstyń ózge belgileri bolmasa, Qazaqstan azamaty arnaıy medıtsınalyq statsıonarǵa 14 kún merzimge baqylaýǵa ornalastyrylady. Osy kezeń ótkennen keıin aýrýdyń qandaı da bir belgileri bolmaǵan jaǵdaıda ol azamat statsıonardan shyǵarylady.
Koronavırýstyq ınfektsııa sımptomdary anyqtalǵan jaǵdaıda naýqas birden ınfektsııalyq aýrýhanaǵa jatqyzylady.
ShQO densaýlyq saqtaý basqarmasy basshysy Іlııas Muhamedjannyń aıtýynsha, óńirdegi
medıtsınalyq uıymdar qajetti dári-dármektermen, maskalarmen, qolǵaptarmen, sondaı-aq qorǵaý kostıýmderimen qamtamasyz etilgen.
Qazirgi tańda arnaıy medıtsınalyq statsıonarda 15 adam baqylaýda jatyr (11 Qazaqstan azamaty jáne 4 QHR azamaty). Búginde baqylaýǵa alynǵan azamattardyń birde-bireýinde koronavırýs belgileri anyqtalǵan joq.
Qytaı azamattary Qazaqstanǵa úshinshi elderden kelgen, olar tranzıttik jolaýshylar bolyp tabylady jáne medıtsınalyq tekserý aıaqtalǵannan keıin (14 kún) elden ketedi.
