ShQO aýylynyń túlekteri mektep bitirý keshiniń ornyna abattandyrý aktsııasyn tańdady
ÓSKEMEN. QazAqparat - Shyǵys Qazaqstannyń Zaısan aýdanyna qarasty Sarterek aýylynyń mektep bitirýshileri túlekter keshinen bas tartyp, ózge zamandastaryna estafeta joldady, dep habarlaıdy QazAqparat tilshisi.
«Biz sońǵy qońyraý merekesi qarsańynda kóp qarajatty qajet etetin, bos maqtan men ysyrapshyldyqqa ákeletin kostıýmder men kóılekterden, sońǵy úlgide jasalǵan, baǵasy sharyqtap turǵan meıramhanalardan astatók jaıylǵan dastarhannan óz erkimizben bas tartamyz. Bar qarajatty biraýyzdan «Jasyl tabıǵatty qorǵaıyq» aktsııasyna atsalysa otyryp, óz mektebimizdiń aýlasyn gúldendirýge beremiz dep sheshtik. Bul estafetany Shyǵys Qazaqstannyń barlyq mektep bitirýshi túlekterine joldaımyz» - delingen beıneúndeýde.
Eske salsaq, QR Bilim jáne ǵylym mınıstri Kúlásh Shámshıdınova mekteppen qoshtasý keshterin ótkizýge qatysty pikir bildirgen bolatyn.
