ShQO aýylynda zamanaýı sport kesheni salynady
ÓSKEMEN. QazAqparat – Shyǵys Qazaqstan oblysy Tarbaǵataı aýdany Tuǵyl aýylynda dene shynyqtyrý jáne saýyqtyrý kesheniniń qurylysy bastalady, dep habarlaıdy QazAqparat.
«Jańa keshen zamanaýı quraldarmen jabdyqtalady. Biz aýdan ortalyqtarynan basqa eldi mekenderge sport keshenin kóptep salýdy josparlap otyrmyz. Sebebi aýyldarda sporttyń damýyna jaǵdaı jasaýymyz qajet. Ol jerlerde balalar men jasóspirimder arasynda baıraqty básekelerde el namysyn qorǵaıtyn bolashaq sportshylarymyzdyń bar ekendigine senimdimin, – dedi ShQO Dene shynyqtyrý jáne sport basqarmasynyń basshysy Denıs Rypakov.
Onyń aıtýynsha, oblys ákiminiń tapsyrmasymen Aqjar aýylynda ıppodrom kúrdeli jóndeýden ótedi. Sondaı-aq Dene shynyqtyrý jáne saýyqtyrý keshenderin Katonqaraǵaı, Úrjar, Borodýlıha jáne Kúrshim aýdandarynyń aýyldarynda salý kózdelip otyr.
