ShQO aýylynda balabaqshada oqyp otyrǵan oqýshylarǵa jańa mektep salynady
ÚRJAR. QazAqparat - Shyǵys Qazaqstan oblysynyń Maqanshy aýylynda balabaqsha ǵıamaratynda oqyp kelgen balalarǵa jańa mektep salynady, dep habarlaıdy QazAqparat tilshisi.
320 oryndyq mekteptiń irgetasy ótken jyldyń qyrkúıek aıynda qaǵylǵan bolatyn. Aýdan basshysy Serik Zaınýldınniń tapsyrmasyna sáıkes, bilim ordasynyń qurylysy bıyl kúzde aıaqtalady. Maqanshy eldi mekeninde 13 myńǵa jýyq halyq bar.
Aıta keterligi, «Maqanshy» orta mektebiniń oqýshylary buryn balabaqsha bolǵan ǵımaratta oqyp keledi. Osyǵan baılanysty oblys basshysy Danıal Ahmetovtyń qoldaýymen Maqanshy aýylynda jańa mekteptiń qurylysy bastaldy.
Jospar boıynsha qurylys jumystaryn «Rýllan Servıs LTD» jaýapkershiligi shekteýli seriktestigi júrgizýde. Bul merdiger budan buryn aýdanǵa qarasty Barqytbel orta mektebine jáne Aqshoqy aýyldyq okrýgine aýyzsý qubyryn tartqan bolatyn.
QazAqparat tilshisi jaqynda qurylys basyna baryp, jumys barysymen tanysyp qaıtqan bolatyn. Bilim ordasynyń oqý korpýstarynyń eńsesi tiktelip, ekinshi qabaty kóterilgen. Kitaphana, sport zaldary, jylý beretin ortalyqtar daıyn. Qurylys qarqyndy júrýde.
«Búgingi kúni qurylysqa qajetti materıaldardyń sapasyna erekshe nazar aýdaryp otyrmyz. Materıaldar Óskemen qalasynan ákelinýde. Qurylys qazir qarqyndy júrip jatyr. Jumys dál osylaı jalǵassa bıylǵy jyldyń qońyr kúzinde bitirýdi josparlap otyrmyz»,- deıdi merdiger kompanııanyń ókili Sanııazbek Janabaev.
