ShQO aýyldarynda eki páterli turǵyn úıler salynyp jatyr
ÓSKEMEN. QazAqparat - Shyǵys Qazaqstan oblysy Jarma aýdanynda eki páterli turǵyn úıler paıdalanýǵa berildi, dep habarlaıdy QazAqparat.
Bul týraly óńir basshysy Danıal Ahmetov óziniń Facebook -paraqshasynda jazdy.
«Búginde Jarma aýdanynda 10 otbasyna arnalǵan eki páterli bes úı salynyp, paıdalanýǵa berilgen. Ár páterdiń aýmaǵy 80 sharshy metr, sondaı-aq jeke aýlasy da bar. Kóktemde taǵy 10 úıdiń qurylysyn bastaý úshin tıisti qarajat bólinedi. Biraq páter aýmaǵyn birneshe sharshy metrge, al aýlany 15 sottyqqa deıin ulǵaıtý kerek» - deıdi oblys ákimi.
Onyń aıtýynsha, turǵyn úı qurylysynyń qarqynyn tómendetken basqa aýdandar osy baǵyttaǵy jumysty kúsheıtý kerek.
«Qajetti qarjy tolyqtaı bólinse de keıbir aýdan ákimderiniń bul turǵydaǵy kórsetkishteri kóńil kónshitpeıdi. Al turǵyn úı kezeginde qanshama adam tur. Sondyqtan muqtaj jandardyń baspana máselesin sheshý úshin eshkim sylbyrlyq tanytpaý qajet. Ákimderge kóktemge deıin ýaqyt beremin. Eger tıisti nátıje bolmasa, qatań sharalar qoldanylady» - deıdi Danıal Kenjetaıuly.
