ShQO aýyldarynda aǵylshyn tilin tegin oqytatyn kýrstar ashylyp jatyr

ÓSKEMEN. QazAqparat - «Nur Otan» partııasynyń úshtildilikke kóshý jobasy aıasynda Shyǵys Qazaqstannyń aýyl mektepterinde aǵylshyn tilin oqytý kýrstary ashylýda, dep habarlaıdy QazAqparat tilshisi.

Búginge deıin 4 aýyl klýbynda shet tilin oqytý kýrsy ashylǵan. Tegin kýrsqa aýyldyqtar qazirdiń ózinde úlken qyzyǵýshylyq tanytyp jatyr. Mysaly, Rıdder qalasyna qarasty Býtakov aýylynyń turǵyndary «Talk now» kýrsyna qatysý úshin ár aptanyń sársenbisinde mektepke jınalýdy ádetke aınaldyrǵan. Olarǵa aǵylshyn tilin biletin eriktiler dáris bermek. Eriktiler tobynyń jetekshisi - aǵylshyn tiliniń oqytýshysy Anna Chernova. 

«Munda til úırený tegin. Sondyqtan, eńkeıgen qart pen eńbektegen balaǵa da esigimiz ashyq. Nıet bildirgen 10 balamen jumys istep jatyrmyz. Olardyń qataryna eresekter de qosylady dep oılaımyz» - deıdi Anna Chernova.

Dál osyndaı klýb Zyrıan aýdanynda Til oqytý ortalyǵy janynan ashyldy. «Nur Otan» partııasynyń aýdandyq fılıaly tóraǵasynyń birinshi orynbasary Irına Lykovanyń aıtýynsha, búginde klýbqa kelýshiler 4 topqa bólinip til úırenýde. 

«Kýrsqa jasy 11-den asqan oqýshylar men eresekter qabyldanady. Al oqytý aptasyna bir ret júrgiziledi» - deıdi partııa ókili.
Úrjar aýdanynda mundaı ortalyq jýyqta ashylmaq. Munda sabaq aptasyna 2 ret ótedi dep kútilýde. 

«Bul aýdanǵa jaqyn kúnderi «Jas Otan» jastar qanatynyń eriktileri «English for jastar» jobasy aıasynda attanbaqshy. Olar úsh aı boıy turǵyndarǵa aǵylshyn tilin tegin úıretedi» - deıdi «Nur Otan» partııasynyń oblystyq fılıalynyń baspasóz hatshysy Aıgúl Bazarova. 
Jyl sońyna deıin basqa 12 aýdanda dál osyndaı til úırený klýbtaryn ashý josparlanǵan.