ShQO aýyldarynda 36 medıtsınalyq mekeme boı kóteredi
ShQO ákimi Danıal Ahmetov qatysýymen ótken ákimdik otyrysynda medıtsına salasyn damytý sóz etildi. Bul salada Prezıdent Qasym-Jomart Toqaev aıtqan barlyq jobalardy iske asyrýǵa basymdyq berilgen.
«Shyǵys Qazaqstan aýyldarynda 36 jańa medıtsınalyq mekeme boı kóteredi. Ol úshin tıisti jer ýchaskeleri tańdaldy. Kadr tapshylyǵy máselesin sheshý de jolǵa qoıylǵan. Atap aıtqanda, oblysqa 72 jas maman keldi. Olarǵa qyzmettik páter berildi», - dedi aımaq basshysy.
Onyń aıtýynsha, medıtsına sapasynyń jaqsarýynyń arqasynda óńirde birqatar aýrýdan bolatyn ólim-jitim kórsetkishi tómendedi.
«Naqty aıtar bolsaq, qan aınalym júıeleri aýrýlarynan ólim-jitim 18%, onkologııa aýrýlarynan 8% jáne tynys alý organdarynyń aýrýlarynan 30% azaıdy. Osy jyldyń toǵyz aıynda oblysta ana óliminiń birde-bir jaǵdaıy tirkelgen joq. Bosandyrý qyzmetteriniń sapasyn jaqsartý úshin osy saladaǵy aýdandyq dárigerlerdi ShQO Ana men bala ortalyǵy bazasynda oqytý týraly sheshim qabyldanǵan. Sondaı-aq bizde zamanaýı PACS derekteri jáne onyń múmkindikterin keńeıtý mindeti tur», - dep qorytyndylady Danıal Ahmetov.