ShQO aýyldarynda 27 medıtsınalyq pýnkt salynady
ShQO ákimdiginiń málimetine súıensek, aýyldarda medıtsına sapasyn arttyrý úshin birqatar sharalar qolǵa alynǵan. Onyń ishinde basty baǵyttardyń biri – jańa medıtsınalyq nysandar salý.
«Memleket basshysy Qasym-Jomart Toqaevtyń tapsyrmasy boıynsha Shyǵys Qazaqstan aýyldaryna 27 medıtsınalyq pýnkt, eki feldsherlik-akýsherlik pýnkt jáne jeti otbasylyq-dárigerlik ambýlatorııa salýdy josparlap otyrmyz. Ol úshin daıyn tıptik jobalar da bar. Aldaǵy ýaqytta qurylys jumystary bastalady», - dedi aımaq basshysy Danıal Ahmetov.
Onyń aıtýynsha, qazirgi ýaqytta Rıdder qalasynda kúnine 500 kelýshige arnalǵan emhana salynyp jatyr. Sonymen qatar atalǵan medıtsınalyq mekeme qurylys jumystary aıaqtalǵan soń patsıentterdi birden qabyldaı bastaýy úshin tıisti jabdyqtar satyp alynýda.