ShQO aýrýhanasyndaǵy jaǵdaıdyń nasharlyǵy týraly vıdeoǵa túsinikteme berildi

ÓSKEMEN. QazAqparat – Áleýmettik jelilerde Óskemendegi medıtsınalyq mekemelerdiń birinde koronavırýs juqtyrǵan naýqastardyń qalaı emdelip jatqandyǵy týraly túsirilgen vıdeo taraǵan bolatyn. Aýrýhananyń bas dárigeri bul aqparatqa qatysty túsinikteme berdi, dep habarlaıdy QazAqparat tilshisi.

5 qazanda naýqastar burynǵy №2 perzenthananyń ǵımaratynda emdelgen. Ana men bala ortalyǵynyń dırektory Ermek Omarbekovtyń aıtýynsha, keshe osy bólimshedegi juqpaly dertke shaldyqqan naýqastardyń sany 89 adamdy qurady. Sondyqtan Densaýlyq saqtaý basqarmasymen birlesip Ana men bala ortalyǵynyń bazasynda qosymsha 300 tósek ashyp, patsıentterdi jańa bólimshege aýystyrý týraly sheshim qabyldanǵan.

«Búgin barlyq naýqastar osynda ornalastyryldy. Bul ǵımaratta tek úsh reanımatsııalyq naýqas qaldy, olar ókpeni jasandy jeldetý apparattarynda jatyr. Biz olardyń ómirine qaýip tóndirmes úshin sol jerde qaldyrdyq. Osy patsıentterdiń jaǵdaıy turaqtanǵan soń Ana men bala ortalyǵy ǵımaratyna aýystyrylady», - deıdi E.Omarbekov.

Óz sózinde ol ǵımarat naýqastardy qabyldaýǵa daıyn emes degen aqparatty joqqa shyǵardy.

«Beınejazbada jas jigit synǵan dárethanany ár qyrynan túsirgende bólimshedegi barlyq dárethanalar osy kúıde ekendeı áser qalady. Sol qabatta taǵy da 6 sanıtarlyq torap bar. Biz patsıentterge bir dárethana jumys istemeıtinin eskerttik. Sondaı-aq, vıdeoda bos tósekter turǵan palata kórsetilgen. Bul patsıentterdiń eshqaısysy emdelmeıtin rezervtik palata», - dedi Ana men bala ortalyǵynyń dırektory.

Onyń aıtýynsha, medıtsınalyq mekemede 60-tan astam adam jumys isteıdi. Barlyq dári-dármekter jetkilikti.

Sonymen qatar, ortalyqta 33 ókpeni jasandy jeldetý apparaty men 23 ottegi kontsentraty bar.