ShQO aýrýhanalary 35 sanıtarlyq mashına aldy
ÓSKEMEN. QazAqparat - Oblystyń medıtsınalyq uıymdary 35 sanıtarlyq avtokólik aldy, dep habarlaıdy «QazAqparat» HAA tilshisi. Bıyl jedel medıtsınalyq kómek jelilik brıgadasy úshin qosymsha taǵy 13 arnaıy mashına men reanımobıl satyp alynady.
2016 jyly jergilikti bıýdjettiń qarjysy esebinen aýyldyq densaýlyq saqtaý jáne emdeý uıymdary, jedel medıtsınalyq kómek stansalary úshin 100 sanıtarlyq avtokólik satyp alynǵan bolatyn.
Óńir úlken aýmaqta ornalasqan medıtsınalyq uıymdardyń tarmaqty jelisimen sıpattalady. Sondyqtan, oblystyń barlyq turǵyndaryn zamanaýı jáne sapaly medıtsınalyq kómekpen qamtamasyz etýde sanıtarlyq avtokólikter mańyzdy ról atqarady, dep habarlaıdy ShQO densaýlyq saqtaý basqarmasy.
Basqarmada atap ótkendeı, oblysta jergilikti bıýdjet qarjysyna satyp alynatyn sanıtarlyq avtokólik parkin jańartý baǵdarlamasy da jalǵasyn tabýda.
