ShQO aýmaǵynda zańsyz jumys istegen Tájikstannyń 29 azamaty anyqtaldy
ShQO Polıtsııa departamenti baspasóz qyzmetiniń málimetine súıensek, tártip saqshylary óńir aýmaǵynda «Ýchaske» jedel aldyn alý sharasyn júrgizip jatyr. Sonyń nátıjesinde, 29 zańsyz ımmıgrant anyqtalǵan.
«Kóshi-qon qyzmetiniń ókilderi Aqtoǵaı kentinde ýákiletti organnyń ruqsatynsyz jel stantsııasynyń qurylys jumystarymen aınalysqan Tájikstan Respýblıkasynyń 29 azamatyn anyqtady. Qazirgi ýaqytta sheteldikterge qatysty QR ÁQBtK-niń 517-baby 5 -bóligine sáıkes ákimshilik hattama toltyryldy. Tıisti materıaldar jaza taǵaıyndaý úshin sotqa jiberildi», - deıdi oblystyq PD kóshi-qon qyzmeti basqarmasynyń basshysy Erbol Bekpaev.
Aıta keteıik, jyl basynan beri Shyǵys Qazaqstanda kóshi-qon zańnamasyn buzǵany úshin 300-den astam adam ákimshilik jaýapqa tartylǵan.