ShQO aýmaǵynda 600-den astam qaýipti nysan anyqtaldy
ÓSKEMEN. KAZINFORM — Shyǵys Qazaqstan oblysy aýmaǵynda 600-den astam qaýipti nysan anyqtaldy.
Oblys boıynsha «Qaýipti nysandar kartasy» jobasy júzege asyrylyp jatyr. Bul týraly óńir prokýratýrasy málimdedi.
Baǵdarlamanyń negizgi maqsaty — balalardyń qaýipsizdigin qamtamasyz etý jáne qaýipti nysandarǵa, atap aıtqanda ıesiz qalǵan ǵımarattar men qurylys alańdaryna kirý múmkindigin shekteý arqyly jazataıym oqıǵalardyń aldyn alý.
— Joba aıasynda osyndaı nysandardy anyqtaý, olardy tıisti deńgeıde qorshaý boıynsha jumystar júrgizilip jatyr. Sondaı-aq nysandardy joıý jáne qaýipsiz jaǵdaıǵa keltirý sharalary qabyldanyp jatyr. Jalpy aımaq boıynsha 643 qaýipti nysan anyqtaldy. Búginde onyń 462-si joıyldy. Prokýratýra qyzmetkerleri men jergilikti atqarýshy organdar bul baǵyttaǵy jumystardy jalǵastyryp jatyr, — dep habarlady oblys prokýratýrasynyń baspasóz qyzmetinen.
Eske salsaq, osyǵan deıin Qyzylordada bala densaýlyǵyna qaýipti oıynshyqtar anyqtalǵany habarlanǵan.
