ShQO aýylyndaǵy qańyraǵan 20 shaqty kópqabatty úı balalarǵa qaýip tóndirip tur
ÓSKEMEN. KAZINFORM — Shyǵys Qazaqstan oblysy Ulan aýdanyndaǵy Aıyrtaý aýylynda qırap turǵan kópqabatty úıler bar. Ata-analar «qoı» dese de tyńdamaı sol jaqqa oınaýǵa ketip qalatyn balalarynyń qaýipsizdigine alańdap otyr.
«Bizdi tyńdar qulaq joq!»
Aıyrtaý aýylyna tabanyńyz tıse áýeden bombylap ketken jerge kelgendeı bolasyz. Sebebi qıraǵan úıler kózge ottaı basylady. Bul úıler aýyldyń ajaryn ketirip qana qoımaı, oıyn balalaryna qaýip tóndirip tur.
— Barlyǵy 20-ǵa jýyq úı bar. Bul úıler Keńes úkimeti kezinde jumys istep turǵan zaýyt jumysshylarynyń baspanalary bolatyn. Qazir aýyldyń ishinde de, syrtynda da qańyrap bos qalǵan. Keıbir adamdar tipti qoqysyn sol jaqqa tógedi. Al balalar bolsa sol mańda oınaýǵa áýes. «Qoı» degendi tilazarlar qaıdan uǵa qoısyn?! Kerisinshe «barma» degen saıyn barǵylary kelip turady. Sol balalardyń qaýipsizdigin oılap alańdaımyz, — deıdi aıyrtaýlyqtar.
Úılerdiń biriniń syrtyna qaýipti ekendigi jaıly jazylyp, eskertilip te qoıylypty. Biraq odan nátıje joq. Aýyl ishinde beton plıtalary da shashylyp jatyr.
— Halyq arasynda bos úıdiń birin malyna qora qylyp alǵandar da bar. Máseleni talaı kóterdik. Alaıda áli kúnge deıin sheshimin tappaı keledi. Bizdi tyńdar qulaq joq! Osy úılerdi buzyp, ornyna jańa nysandar salsa, aýylymyz kórkeıer edi, — deıdi turǵyndar.
Úıler zańdastyrylyp jatyr
Osy rette, jergilikti bıliktiń jaýabyn bilý úshin Ulan aýdany ákimdigine habarlasyp kórdik.
— Qazirgi tańda ıesiz qalǵan jáne uzaq jyldar boıy paıdalanylmaǵan eki qabatty turǵyn úılerdi zańdastyrý jumystary júrgizilip jatyr. Atalǵan jumystar aıaqtalǵan soń, eski ǵımarattardy buzyp, aýmaqty qalpyna keltirý sharalary qolǵa alynady dep josparlanyp otyr, — dep jaýap berdi ákimdikten.
P/S: Qıraǵan úılerdiń qaýpi jaıly jergilikti ákimdik habardar. Aldaǵy ýaqytta úılerdiń buzylatyndyǵy da belgili boldy. Alaıda ázirgi naqty ýaqyty belgisiz. «Jaman aıtpaı jaqsy joq» demekshi, sharýanyń qaıǵyly oqıǵa bolmaı turyp qolǵa alynǵany jón. Baýyr eti balalary úshin ýaıym keshken aýyl jurtshylyǵy da bul másele jaqyn arada sheshimin tabady dep kútedi.
Eske salsaq, buǵan deıin Óskemende Panton kópirindegi jóndeý jumystarynan halyq uzyn-sonar kepteliste turýǵa májbúr ekendigi jaıly jazǵanbyz.