ShQO aýylyndaǵy feldsherlik-akýsherlik pýnkt ǵımaraty apatty jaǵdaıda tur

ÓSKEMEN. KAZINFORM — Shyǵys Qazaqstan oblysyndaǵy Qaraótkel aýylyndaǵy FAP ábden tozǵan. Turǵyndar máseleni talaı kótergenderimen odan esh nátıje shyqpaı kele jatqanyna qynjylatyndaryn jetkizdi.

Qaraótkel aýyly Samar aýdanyndaǵy Aqqala aýyldyq okrýginiń quramyna kiredi. 30-dan astam úı bar. Aýdan ortalyǵynan 60 shaqyrym jerde ornalasqan. Mundaǵy halyqty tolǵandyryp turǵan negizgi másele — jóndeý kórmeı kele jatqan feldsherlik-akýsherlik pýnkt.

— Bul týraly talaıdan beri aıtyp kelemiz. Alaıda nátıje joq. FAP-tyń ábden sıqy ketip tur. Qabyrǵalary men tóbesi opyrylyp qulap jatyr, edeni tolǵan tesik. Іshi shirı bastaǵandyqtan, jaǵymsyz ıis qolqańdy qabady. Ákimdiktegiler únemi jyl saıyn «Kelesi jyly jóndep beremiz» dep sendirip alady da kelesi jyl bolǵanda «Oǵan aqsha bólinbedi» dep shyǵaryp salady. Munda maman da jetispeıdi, dáriger joq. Tek sanıtar ǵana bar, — deıdi aty-jónin jarııalamaýdy suraǵan aýyl turǵyny.

Osy máselege qatysty jýyqta Óskemendegi baspasóz máslıhatyna kelgen Samar aýdany ákiminiń orynbasary Qaıdar Surashevten suradyq. Ol óz jaýabyn bul eldi mekenniń nazarsyz qalmaǵanynan bastady.

— Bıyl Qaraótkel aýylynda birshama joba iske asyryldy. Atap aıtqanda, eki kóshe tolyqtaı jaryqtandyryldy. Aýyldyq klýbqa merdiger kompanııa tarapynan aǵymdaǵy jóndeý júrgizildi. Biraq jumys aıaqtalǵan joq. Tehnıkalyq sheshim shyǵarylǵan soń ary qaraı sharalar qabyldanady. Qaraótkeldegi feldsherlik-akýsherlik pýnktke Samar aýylynan medbıkeler issapar túrinde baryp, turǵyndarǵa qyzmet kórsetip júr. FAP-tyń kúrdeli jóndeýdi qajet etetini ras. Osyny retteý úshin bolashaqta birneshe josparymyz bar. Ázirge naqty qandaı sheshim shyǵarylatynyn aıtýǵa erteleý, — dedi Qaıdar Surashev.

Al Samar aýdandyq aýrýhanasynan sál tolyǵyraq maǵlumat alý múmkin boldy.

— Qaraótkel aýylyndaǵy feldsherlik-akýsherlik pýnkt ǵımaraty apatty jaǵdaıda tur. Osy aýyldaǵy klýbta jóndeý jumystary aıaqtalǵannan keıin FAP sonda ornalastyrylady dep kútilýde. Sonymen qatar, medıtsınalyq pýnktte dáriger shtaty qarastyrylmaǵanyn habarlaımyz. Al feldsher, medıtsınalyq meıirbıke shtaty bar. Oǵan jumysqa adam kerektigi týraly kadrlardy basqarý qyzmeti turaqty túrde Enbek.kz saıtyna habarlama berip turady. Dese de áli kúnge deıin eshkim qulshynys tanytpady, — delingen aqparatta.

Demek, rasymende kelesi jyly másele sheshimin taýyp qalýy múmkin. Tek klýbtaǵy jóndeý jumystary saǵyzsha sozylyp ketpese ıgi. Halyqtyń da qorqynyshy sol.

Eske salsaq, bıyl qarasha aıynda óskemendikter № 1 emhananyń tozyp turǵanyna shaǵymdanǵan bolatyn.