ShQO Aýyl sharýashylyǵy basqarmasynyń basshysy sottaldy

Shyǵys Qazaqstan oblysy Aýyl sharýashylyǵy basqarmasynyń  eks-basshysy Vladımır Gaılamazıan qyzmettik ókiletin asyra paıdalanǵany úshin 3 jarym jylǵa túrmege qamaldy, dep habarlaıdy QazAqparat tilshisi. 

Óskemen qalalyq №2 sottyń málimetinshe, oblystyq Aýyl sharýashylyǵy basqarmasynyń burynǵy basshysy Vladımır Gaılamazıan men jergilikti JShS-lardyń biriniń basshysyna qatysty qylmystyq is qaraldy. Belgili bolǵandaı, 2020 jyly ekeýi agroónerkásiptik keshen sýbektilerin sýbsıdııalaý tártibin buzyp, asa iri kólemde bıýdjet qarajatyn jymqyrǵan.

«JShS basshysy jaıylymdy sýarýdy qajet etetin sharýa qojalyqtaryn izdep taýyp, olarǵa sýbsıdııa alýǵa kómektese alatynyn jetkizip otyrdy. Alaıda olardyń óz qudyqtary joq bolǵandyqtan zań boıynsha bıýdjetten kómek alýǵa quqyǵy bolmaǵan. JShS basshysy sharýa qojalyqtar ıeleriniń qujattary men elektrondyq tsıfrlyq qoltańbalaryn alyp, sýbsıdııa alýǵa 395 ótinish berdi. Onyń ústine ótinishterde jabdyqtardyń baǵasyn ádeıi joǵarylatyp jibergen. Sondaı-aq qarajatty aýdarý shoty retinde óz JShS-niń esepshotyn kórsetti», - delingen aqparatta.

Bul ótinishterge Aýyl sharýashylyǵy basqarmasy teris jaýap berýi tıis edi. Alaıda basqarma basshysy aralasyp, qolastyndaǵy mamandarǵa barlyq aryzdy maquldaýdy tapsyrǵan. Nátıjesinde mamandar oń qorytyndy jasap, ótinishterde kórsetilgen JShS esepshotyna bıýdjetten 979 600 000 teńge aýdarylǵan.

«Sot sheshimimen Vladımır Gaılamazıan QR Qylmystyq kodeksiniń 361-baby 4-bóliginiń 3-tarmaǵymen (qyzmettik ókilettikterin teris paıdalanýdyń aýyr zardaptarǵa ákep soǵýy) kináli dep tanyldy. Aıyptalýshy úsh jarym jylǵa bas bostandyǵynan aıyrylyp, ómir boıyna memlekettik qyzmette laýazym atqarý quqyǵyn joǵaltty. Al JShS basshysy alaıaqtyq jasaǵany úshin 5 jylǵa túrmege qamaldy», - delingen sot úkiminde.