ShQO: Altaı aýdanyna ásker men tehnıka jiberildi

ÓSKEMEN. QazAqparat - Shyǵys Qazaqstan oblysyndaǵy sý tasqyny kezeńinde yqtımal qaýipterdiń aldyn alý jáne monıtorıng júrgizý maqsatynda Altaı aýdanyna 68303 áskerı bóliminiń 15 áskerıi men 2 tehnıka jiberildi, dep habarlaıdy QazAqparat tilshisi.

Aımaqtaǵy tótenshe jaǵdaı departamenti baspasóz qyzmetiniń habarlaýynsha, jiberilgen kúshter men quraldar Zýbovsk kentinde sý tasqynyn baqylaıtyn 2 beket uıymdastyrǵan.

«Áskerılermen halyqtyń áleýmettik osal toptaryna kómek kórsetý jáne aryq júıelerin tazalaý boıynsha aldyn alý jumystary júrgizilýde. Zarechnyı kóshesinde 25 metr aryq júıeleri muzdan aryldy, Grıaznýshka ózenindegi kópirdiń asty eni 2 metr, tereńdigi 70 santımetr tazartyldy. Lazo kóshesinde halyqtyń áleýmettik osal toptary turatyn úılerden bastap, uzyndyǵy – 135 metr, eni 90 santımetr aryq júıelerin qardan tazartý boıynsha aldyn alý is-sharalary júrgizildi», - delingen habarlamada.