ShQO: Altaı aýdanynda úılerge qaýip tóndirgen karer sýy úzdiksiz sorǵyzylýda
ÓSKEMEN. KAZINFORM – Shyǵys Qazaqstanda oblysy Altaı aýdanynda úılerge qaýip tóndirgen karerden sý táýlik boıy sorylýda.
Altaı aýdanynda sorǵy stantsııasy táýlik boıy jumys isteýde.
«Oqıǵa ornyna oblys ákimi Ermek Kósherbaev keldi. Aýdandaǵy ken ornynyń jumysy toqtatylǵannan keıin, karerde sý jınalyp, shaǵyn kól paıda bolǵan. Sý mólsheri qaýipti deńgeıden asqannan keıin sol mańdaǵy eldi mekenderdegi úılerge sý kirmes úshin sorǵy stantsııasy iske qosylyp, artyq sýdy aǵyzýda. Jalpy qazirgi sý tasqyny kezeńi bastalǵaly sorǵy stantsııasy úzdiksiz jumys istep tur», - dep habarlady ShQO ákiminiń baspasóz qyzmetinen.
Budan bólek jergilikti ákimdik bóget salyp, sý ótkizgish qubyr ornatqan. Aldaǵy ýaqytta qosymsha stantsııa salý nemese sý ótkizýshi jer asty kanal salý jumysy oılastyrylmaq.
Aıta keteıik, burynǵy ken ornyndaǵy qaldyq jáne artyq sýdy shyǵaryp otyrǵan sorǵy stantsııasy 2010 jyly iske qosylǵan.
