ShQO: Aldaǵy eki jylda taza sý Úrjar aýdanynyń 85 paıyzyna tartylady
ÚRJAR. QazAqparat - Shyǵys Qazaqstan oblysy Úrjar aýdanyndaǵy eldi mekenderdiń tek 50 paıyzy ǵana taza aýyzsýmen qamtamasyz etilgen. 2020 jylǵa qaraı tirshilik nárine aýyl halqynyń 85 paıyzy qol jetkizedi dep kútilýde. Bul týraly Úrjar aýdanynyń ákimi Serik Zaınýldın aýdan turǵyndary aldynda esep berý barysynda aıtty. Aıta keteıik, aýdan ákiminiń esepti jıynyna Shyǵys Qazaqstan oblysy ákiminiń birinshi orynbasary Nurymbet Saqtaǵanov qatysty.
Aýdan ákimi Serik Zaınýldınniń aıtýynsha, bıylǵy jylǵa respýblıkalyq bıýdjet esebinen Qarabuta, Maqanshy, Qaratuma aýyldaryndaǵy sý qubyryn jańartý jumystaryna 927,9 mln teńge, oblystyq bıýdjetten 92,9 mln teńge kóleminde qarjy bólingen.
«Búgingi tańda aýdannyń 50 paıyzy ǵana aýyzsýmen qamtamasyz etilgen. 2018-2019 jyldarǵa Qabanbaı, Aqjar, Joǵarǵy Eginsý, Eltaı aýyldaryndaǵy sý qubyry qurylystarynyń jobalyq-smetalyq qujattaryn ázirleýge oblystyq bıýdjetten 34 mln teńge kóleminde qarjy bólindi. Osylaısha aýdandaǵy eldi mekenderdi taza aýyzsýmen 2020 jylǵa deıin 85 paıyz qamtamasyz etemiz», - dedi aýdan basshysy.
Onyń sózine qaraǵanda, aǵymdaǵy jyly aýdan ortalyǵynda 25 metrlik júzý basseıni men «Nurly jer» turǵyn úı baǵdarlamasy aıasynda 30 páterli turǵyn uı qurylysyn salý josparlanyp otyr. Budan bólek, Alakól jaǵalaýyn abattandyrý jumystary jalǵasyp, Qabanbaı aýylyndaǵy mádenıet úıiniń ǵımaratyn aǵymdy jóndeý jumystaryna qarajat bólinedi. Onda tarıhı-arheologııalyq murajaı ashý baǵytynda jumystar júrgiziledi.
Aıta keterligi, Qazaqstan Respýblıkasy Prezıdentiniń 2005 jylǵy 6 sáýirdegi "Jergilikti atqarýshy organdar basshylarynyń halyqqa esep berý kezdesýlerin ótkizý týraly" Jarlyǵyna sáıkes barlyq deńgeıdegi ákimder jyl saıyn qańtar-aqpan aılarynda aýdan, aýyl turǵyndary aldynda esep berip keldi. Ákimderdiń esep berýi - atqarýshy organdardyń halyqtyń aldyndaǵy jaýapkershiligi men eseptiligin arttyrýǵa qol jetkizýdiń halyqty memlekettik basqarý protsesin keńinen taratýdyń birden-bir joly.
ZÝHRA NURJANQYZY
