ShQO: Alakóldi abattandyrýǵa 817 mln teńge bólindi
ÚRJAR. QazAqparat - Shyǵys Qazaqstan oblysy, Úrjar aýdanyndaǵy Alakól jaǵalaýyn abattandyrýǵa oblystyq bıýdjetten 817 mln teńge bólindi. Bul týraly ShQO týrızm jáne syrtqy baılanystar basqarmasynyń basshysy Jasulan Sársebaev Úrjar aýdanynyń kásipkerlerimen kezdesýi barysynda aıtty, dep habarlaıdy QazAqparat tilshisi.
Basqarma basshysynyń aıtýynsha, Alakólge bıyl maýsym men qyrkúıek aıynyń ortasyna deıin «Semeı-Shar-Aıagóz-Aqtoǵaı-Jalańashkól», «Óskemen-Shar-Aıagóz-Aqtoǵaı-Jalańashkól» baǵytynda poıyzdar qatynaıtyn bolady. Bir jaqqa jetý ýaqyty 15 saǵat bolady.
«Alakól kóliniń emdik qasıetterin zertteý boıynsha kezeń-kezeńimen júrgiziletin jumystar bastaldy. Byltyrǵy alǵashqy kezeńniń ózinde 27 mıkroelementter men emdik gaz-radonnyń bar ekendigi anyqtalǵan. Zertteý jumystary bıyl da jalǵasatyn bolady. Keleshekte emdik protsedýralardy qosý arqyly demalys bazalarynyń jumys ýaqytyn sýǵa túsý kezeńinen erte bastap, maýsymdy birazǵa deıin sozýǵa bolady», - deıdi basqarma basshysy.
Onyń sózine qaraǵanda, kóldiń jaǵalaýyn abattandyrý baǵytynda eń úzdik ART jobaǵa konkýrs uıymdastyrylǵan.
Budan bólek, 2018-2019 jyldar aralyǵynda Maqanshydan Kóktal aýylyna deıin (52 shaqyrym) 110 kVt-tyq elektr jelisin tartý josparlanýda. Condaı-aq oblystyq bıýdjet esebinen Jalańashkólden Qabanbaı aýylyna deıingi joldy jóndeý josparlanyp otyr. Josparlanǵan 49 shaqyrym joldyń 25 shaqyrymy jóndelgen, qalǵan 24 shaqyrymy bıyl shilde aıyna deıin aıaqtalady.
Aıta keterligi, ótken jyly Alakóldi abattandyrýǵa oblys bıýdjetinen 500 mln teńge bólinip, kóldiń jaǵalaýyn abattandyrý alǵash ret qolǵa alynǵan bolatyn. Odan bólek polıtsııa jáne medıtsınalyq pýnktter salynyp, kóshelerge 80 beınebaqylaý kameralary ornatyldy.
Aıta keteıik, kezdesýge oblystyq tótenshe jaǵdaılar departamenti basshysynyń orynbasary Amangeldi Shegetaev, ShQO Qoǵamdyq densaýlyq saqtaý departamentiniń sanıtarlyq-gıgıenalyq obektilerine tekserý júrgizý bóliminiń bas mamany Gúlmıra Naýqanova, oblystyq kásipkerlikti damytý «Damý» qorynyń qarjy agenti Erjan Razbekov qatysty.
