ShQO ákiminiń birinshi orynbasary Jaqsylyq Omarǵa qatysty tergeý júrgizilip jatyr – UQK

ÓSKEMEN. KAZINFORM – Buǵan deıin áleýmettik jelilerde Shyǵys Qazaqstan oblysy ákiminiń birinshi orynbasary Jaqsylyq Omardyń ustalǵany týraly aqparat taraǵan bolatyn. Osyǵan baılanysty Kazinform agenttiginiń resmı saýalyna QR Ulttyq qaýipsizdik komıteti jaýap berdi.

– Qazirgi ýaqytta sotqa deıingi tergep-tekserý amaldary júrgizilip jatqanyn habarlaımyz, - delingen vedomstvo jaýabynda.

Sondaı-aq UQK ókilderi ózge málimettiń jarııa etilmeıtinin atap ótti.

– QR Qylmystyq-protsestik kodeksiniń 201-babynyń 1-bóligine sáıkes ózge aqparat jarııa etýge jatpaıdy, - dedi bólimshe bastyǵy O. Bektenov.

Budan buryn ShQO ákimdigi atalǵan laýazymdy tulǵaǵa qatysty pikir bildirgen edi. Ákimdiktiń málimetinshe, ınternette taraǵan aqparat resmı derekkózder arqyly rastalmaǵan. Sondaı-aq laýazymdy tulǵanyń densaýlyǵyna baılanysty ýaqytsha eńbek demalysynda ekeni habarlanǵan.

Eske sala keteıik, buǵan deıin Alataýda kolonııa basshysynyń eks-orynbasary birneshe ret para aldy degen kúdikpen ustalǵanyn habarlaǵanbyz.