ShQO ákiminiń birinshi orynbasary Jaqsylyq Omar 6 jylǵa sottaldy

ÓSKEMEN. KAZINFORM - Óskemende Shyǵys Qazaqstan oblysy ákiminiń birinshi orynbasary Jaqsylyq Omarǵa qatysty sot úkimi shyqty.

Búgin Óskemen qalasynyń qylmystyq ister jónindegi aýdanaralyq sotynda Shyǵys Qazaqstan oblysy ákiminiń birinshi orynbasary Jaqsylyq Omarǵa qatysty sot protsesi aıaqtaldy.

Sot sheshimimen aıyptalýshy QR QK-niń 190-baby 3-bóliginiń 1, 2-tarmaqtary (iri mólsherdegi alaıaqtyq), 366-baby 3-bóliginiń 3-tarmaǵy (iri mólsherde para alý) kináli dep tanyldy.

- Sottalýshyǵa 6 jyl merzimge bas bostandyǵynan aıyrý jazasy taǵaıyndaldy. Sondaı-aq onyń múlki, ıaǵnı Toyota Camry avtokóligi tárkilenip, memlekettik qyzmette laýazym atqarý quqyǵynan ómir boıyna aıyryldy, - delingen sot úkiminde.

Jaqsylyq Omar óz jazasyn qaýipsizdik deńgeıi ortasha túzetý mekemesinde óteıdi.

Eske salsaq, osyǵan deıin Prokýror ShQO ákiminiń burynǵy orynbasary Jaqsylyq Omardy 6 jylǵa sottaýdy suraǵany habarlanǵan.