ShQO ákimi: Úlken Naryn aýylynda qaza tapqan jumysshylardyń otbasylaryna jan-jaqty kómek kórsetiledi
ÓSKEMEN. KAZINFORM - Oblys ákimi Nurymbet Saqtaǵanov keshe bolǵan qaıǵyly oqıǵaǵa baılanysty shuǵyl túrde Úlken Naryn aýdanyna bardy. Úlken Naryn aýylynda sý qubyry jarylǵan jerde apatty qalpyna keltirý jáne jer qazý jumystary kezinde topyraq opyrylyp, «Naryn KomHoz Servıs» kommýnaldyq kásipornynyń eki qyzmetkeri — dánekerleýshi Erjan Aıtpaev (1983 jyly týǵan) jáne slesar Sergeı Kasterın (1970 jyly týǵan) qaza tapty.
Oqıǵa ornynda oblys ákimi arnaıy komıssııa múshelerine óndiristik jáne eńbek qaýipsizdigin qamtamasyz etýge qatysty qoldanystaǵy reglamentterdi túbegeıli qaıta qaraý qajettigin atap ótti.
— Beıbit, turaqty ýaqytta óndiristik qaýipsizdik talaptarynyń buzylýynan adam óliminiń oryn alýy múlde jol berilmeıtin jaǵdaı. Qyzmetkerlerdiń ómiri men densaýlyǵy kez kelgen kásiporyn úshin eń joǵary basymdyqta bolýy tıis — bul kez kelgen ekonomıkalyq múddeden mańyzdy. Ákimdik atynan qaza tapqandardyń otbasylaryna shyn júrekten kóńil aıtyp, biz olarǵa jan-jaqty qoldaý kórsetetinimizdi jetkizgim keledi. Sonymen qatar, tıisti organdarǵa oqıǵanyń sebepterin anyqtap, oǵan kináli adamdardyń jaýapkershiligin belgileý úshin jan-jaqty ári ádil tekserý júrgizýdi tapsyrdym, — dedi Nurymbet Saqtaǵanov.
Oqıǵany tergeıtin komıssııanyń tóraǵasy — Shyǵys Qazaqstan oblysynyń bas eńbek ınspektory Baqytbek Qızatovtyń aıtýynsha, aldaǵy on kún ishinde oqıǵaǵa baılanysty jan-jaqty tergeý júrgiziledi. Qajet bolǵan jaǵdaıda tergeý merzimi 30 kúnge deıin uzartylyp, salalyq sarapshylar tartylatyn bolady. Qorytyndy materıaldar quqyq qorǵaý organdaryna jáne sot ınstantsııalaryna beriledi.
Oblys ákimi óndiristik jaraqattardyń aldyn alý máselelerine keshendi túrde qaraý qajettigin erekshe atap ótip, ásirese adamdardyń ómirine qaýip tóndiretin jaǵdaılarda eńbek qaýipsizdigi men eńbekti qorǵaý oblys basshylyǵynyń turaqty baqylaýynda bolatynyn jetkizdi.
Qaza tapqandardyń otbasylaryna respýblıkalyq bıýdjetten ótemaqy tólenedi, sondaı-aq saqtandyrý tetikteri arqyly qarastyrylǵan ótemaqylar beriledi. Óńir basshysy marqumdardyń týystarymen jeke kezdesip, olardyń nazardan tys qalmaıtynyn jáne olarǵa tıisti kómek kórsetiletinin aıtty.