ShQO ákimi: Óskemen kásiporyndarynyń ekologııaǵa bólgen aqshasy joq bop ketip otyrǵan

ASTANA. KAZINFORM – Shyǵys Qazaqstan oblysynyń ákimi Ermek Kósherbaev Úkimet otyrysynda Óskemendegi aýa sapasyn jaqsartý úshin ne isteıtinin aıtty.

— Biz kásiporyndardyń ekologııalyq emıssııalary esebinen jyl saıyn 4 mlrd teńgedeı aqsha jınaımyz. Buryn osy aqsha qumǵa sińgen sý sııaqty bolǵanǵa uqsaıdy. Bolǵanǵa uqsaıdy emes, naqty solaı bolǵan. Túrli sharalardyń tasasynda joq bolyp ketip otyrǵan. Dál osy aqshanyń esebinen Óskemendegi aýanyń sapasyn jaqsartý baǵytynda naqty bir istelgen sharýa joq, — dedi ol.

Ákimdik osy aqshanyń qalanyń ekologııasyna ǵana jumsaýdyń jańa júıesin túzbekshi. 

— Endi osy aqshany qalanyń aýa sapasyn jaqsartýǵa tikeleı baǵyttap, ony baqylaýǵa qoǵamdy tartpaqpyz. Oblysta ekologııalyq bıýro quryldy. Osy qoǵamdyq birlestikpen birge atalǵan aqshanyń esebinen qalanyń qaı bóligine aýa súzetin qondyrǵylar qoıatynymyzdy aıqyndaımyz, — dedi Ermek Kósherbaev.

Eske salsaq, Óskemen qalasynda turǵyn aýdandarda kóligin 5 mınýttan artyq qyzdyrǵan 3 adamǵa aıyppul salynǵan bolatyn.