ShQO ákimi Danıal Ahmetovpen sottasqan kásipkerler máselesi týraly aıtty
Shyǵys Qazaqstan oblysynyń ákimi Ermek Kósherbaev óńirde jınaqtalǵan problemalardy sheshýge qansha ýaqyt ketetinin jáne burynǵy ákim Danıal Ahmetovpen sottasqan kásipkerlermen qarym-qatynasy qalaı ekenin aıtyp berdi, dep habarlaıdy Kazinform agenttigi.
«Danııar Kenjetaıuly Ahmetov segiz jyldan astam, toǵyz jylǵa jýyq jumys istedi. Men oblys ákiminiń orynbasary qyzmetinde onymen úsh apta jumys istep úlgerdim. Sodan keıin men aýyl sharýashylyǵy mınıstrligine aýystym. Árıne, bári osylaı bolady dep oılamadym, júregime jaqyn oblysqa qaıta oralarymdy bilmedim», - dedi E. Kósherbaev Ortalyq kommýnıkatsııalar qyzmetinde ótken baspasóz máslıhatynda.
Oblys ákiminiń aıtýynsha, problemalar ár ýaqytta bolǵan jáne aldaǵy ýaqytta da bola beredi.
«Men keterde de problemalar bolady dep oılaımyn. Bireý birdeńe jasady dep oılaý jáne men sheshýim kerek degen pikir durys emes. Jaı ǵana halyqtyń ómirin jaqsartý kerek. Halyqtyń ómirin jaqsartý úshin bıznesti damytýǵa yqpal etý kerek, jańa jumys oryndaryn qurý men kásipkerlikti damytý úshin jaǵdaı jasaý kerek, salyq salynatyn bazany ulǵaıtý jáne kóptegen basqa máselelerdi sheshý qajet. Árıne, bıýdjetten aqsha ala otyryp, biz mádenıetti, densaýlyq saqtaýdy, bilim berýdi damytý úshin qarapaıym jaǵdaılar jasaýymyz kerek. Men bul jumysty óz maqsatym dep bilemin jáne ony jalǵastyramyn. Men ShQO turǵyndarynyń ómirin jaqsartý úshin jumys isteımin», - dedi oblys ákimi Ermek Kósherbaev.
Kásipkerlermen qarym-qatynas jóninde ShQO ákimi óziniń alǵashqy kópshilik kezdesýi dál osy bıznes-qoǵamdastyqpen ótkenin atap ótti.
«Men adamdardy jınap, ashyq jaǵdaıda jumys isteıtinimizdi aıttym. Joldar bárine ashyq. Qara tizimge engizilgen kásipkerler de boldy, qandaı sebeptermen ekenin bilmeımin. Mysaly Samar aýdanynan óte jaqsy kásipker keldi. Oǵan tenderlerge qatysýǵa tyıym salynǵan eken. Osyǵan qaramastan, tender alǵan jergilikti jigitter onymen qosalqy merdigerlikte jumys isteýge kelisti. Kez kelgen jaǵdaıdyń sheshimin tabýǵa bolady. Osylaısha, eshkimdi bóle-jaryp, arnaıy jaǵdaı jasamaımyn, ondaı jaǵdaı bolmaıdy dep te úmittenemin, - dedi Ermek Kósherbaev.
