ShQO ákiminiń TKSh jáne qurylys máseleleri boıynsha orynbasary taǵaıyndaldy

ÓSKEMEN. QazAqparat - Búgin ShQO ákimi Danıal Ahmetov TKSh jáne qurylys máselelerine jetekshilik etetin jańa orynbasarymen tanystyrdy. Ol buryn «QazAvtoJol» AQ ShQO boıynsha fılıalynyń dırektory bolǵan Serik Aqtanov, dep habarlady «QazAqparat» HAA tilshisi.

Serik Aqtanov 1960 jyly 1 tamyzda týdy. 1983 jyly «Avtomobıl joldary», ınjener-qurylysshy mamandyǵy boıynsha Óskemen qurylys-jol ınstıtýtyn támamdady. Tehnıkalyq ǵylymdar kandıdaty. Eńbek jolyn Zaısan qalasy №553 jol-paıdalaný ýchaskesiniń sheberi bolyp bastady.

1984-1987 jyldary Óskemen qurylys-jol ınstıtýtynyń Almaty jalpy tehnıkalyq fakýltetiniń «Avtomobıl joldary» kafedrasynyń assıstenti, taǵylymdamadan ótýshisi boldy. 1987-1990 jyldary Máskeý avtomobıl-jol ınstıtýtynda aspırantýrada oqydy. Budan keıin Óskemen qurylys-jol ınstıtýtynyń «Avtomobıl joldary, kópirler men tonnelder» kafedrasynyń assıstenti boldy.

1992-1999 jyldary jeke kompanııalardy basqardy. 1999-2014 jyldary «Kazahavtodor» RMK júıesinde eńbek etti: ShQO jáne Atyraý oblystarynda óńirlik fılıaldardy basqardy. Kásiporyn bas dırektorynyń orynbasary, bas dırektory bolǵan.