ShQO ákimi jemisti eńbek etken áıelder qaýymyn merekemen quttyqtady
ÓSKEMEN. QazAqparat – Shyǵys Qazaqstan oblysynyń ákimi Danıal Ahmetov sport, mádenıet, ǵylym men bilim, medıtsına jáne basqa da salalarda jemisti eńbek etip júrgen áıelderdi kele jatqan merekesimen quttyqtap, estelik syılyqtar, alǵys hattar tabys etti, dep habarlaıdy QazAqparat tilshisi.
Dástúrli merekelik kezdesý barysynda aımaq basshysy názik jandylardy kele jatqan Halyqaralyq áıelder kúnimen quttyqtap, jyly lebizin joldady.
«Álemniń jaryǵyn syılaǵan Ana – ómirdiń ózegi, tirshiliktiń tamyry. Sizder bul dúnıeni sulýlyqpen toltyryp, náziktikpen jylytasyzdar. Qyzmette, otbasynda barshamyzdy qamqorlyq pen shapaǵatqa bólep, izgilik nuryn shashasyzdar. Otbasynyń shýaǵy bolǵan áıel Otanǵa da adal qyzmet etedi. Sizder táýelsiz elimizdiń damýy men gúldenýine súbeli úles qosyp kelesizder», - dedi Danıal Ahmetov.
Shara barysynda oblys ákimi Olımpıada chempıony Olga Rypakovaǵa Qazaqstan Respýblıkasynyń Prezıdenti Qasym-Jomart Toqaevtyń quttyqtaý hatyn tabys etti.
Sondaı-aq kezdesýge qatysqan kóp jylǵy adal eńbek etip kele jatqan dárigerlerge, sportshylarǵa, muǵalimderge, jýrnalıster men kópbalaly analarǵa ShQO ákimi men oblystyq máslıhat hatshysynyń Alǵys hattary tabys etildi.
«Otbasynyń uıytqysy bolýymyzǵa bizdiń er azamattarymyzdyń úlken qoldaýy men qorǵan bolýy kúsh beredi. Osy kezdesýdi paıdalana otyryp, elimizdiń, oblysymyzdyń bilim berý salasynda, ásirese jastar men balalarǵa jasalyp jatqan jumystarǵa ana retinde rızashylyǵymdy bildirgim keledi. Meniń balam sport úıirmelerine tegin barady. Qazirgi kúni tórtinshi tildi memleket qoldaýynyń arqasynda esh aqysyz meńgerip jatyr. El erteńi - búgingi urpaqqa jasalǵan qamqorlyqty naǵyz tabysty is dep bilemin», - dedi «Ulaǵat» QB jetekshisi Aıaýjan Áshimova.
