ShQO ákimi Ulybrıtanııada júr
ÓSKEMEN. QazAqparat - Shyǵys Qazaqstan oblysynyń ákimi Danıal Ahmetov Eýropa qaıta qurý jáne damý bankimen seriktestik aıasynda jumys saparymen Ulybrıtanııada júr, dep habarlaıdy QazAqparat tilshisi.
«5-7 naýryzǵa josparlanǵan issapardyń alǵashqy kúninde ShQO basshysy Londondaǵy qatty turmystyq qaldyqtardy suryptaý jáne qaıta óńdeý zaýytyn aralap, el astanasyndaǵy qoǵamdyq tasymaldaýdy uıymdastyrý júıesiniń qyzmetimen tanysty» - delingen oblys ákiminiń baspasóz qyzmeti taratqan aqparatta.
Búgin Danıal Ahmetov Eýropa qaıta qurý jáne damý bankiniń birinshi Vıtse-Prezıdenti Alon Pılokspen kezdesip, óńirdiń ınfraqurylymyn damytýǵa baǵyttalǵan ınvestıtsııalyq jobalardy talqylady.
Іssapar oblys ákimi men bank prezıdenti Sýma Chakrabartı arasynda 5,6 mıllıard teńgeniń ıvnestıtsııalyq jobasyn qarjylandyrý týraly kelisimge qol qoıý rásimimen jalǵasty. Atalmysh joba «ShQO qalalary men aýdan ortalyqtaryn jaryqtandyrý júıesin jańǵyrtýdy» kózdeıdi.
Jańa joba Shyǵys Qazaqstannyń 630 myńnan astam turǵyny bar 6 qalasy men 11 aýdan ortalyǵyn qamtıdy. Osynyń arqasynda 32 myń energııa únemdeýshi sham ornatylmaq. Búgingi tańda atalmysh bank Óskemen men Semeıde aqyldy jaryqtandyrý júıesin engizýge 4,8 mlrd teńge ınvestıtsııa salyp otyr. Onyń aıasynda 25 myń shamdy energııa únemdeýshi túrine aýystyrý josparlanǵan. Mamyr aıynda qurylys-montaj jumystary bastalady.
Kelissózder nátıjesinde Eýropalyq bank Óskemende qaldyqtardy zamanaýı jolmen joıý jáne qaıta óńdeý jobasynyń tehnıkalyq qujattamasyn jasaý jáne qarjylandyrý múmkindigin qarastyrýǵa kelisim berdi. Joba quny - 29,5 mıllıard teńge. Sonymen qatar, EQQDB Zaısan, Úrjar, Tarbaǵataı aýdandarynyń 50 eldi mekenin gazdandyrý jobasyn zertteýge kirisedi. Bul joblardyń - quny 33,3 mıllıard teńge dep baǵalanǵan.
2015 jyldan bastap oblys ákimdigi men Eýropalyq bank 46,1 mıllıard teńgeniń 10 nesıelik kelisimshartyna qol qoıǵan. Bularǵa joǵardy atalǵan eki jobany qossaq, Londonnan Shyǵys Qazaqstanǵa tartylatyn ınvestıtsııa kólemi 108,9 mıllıard teńgege jetedi.
Kezdesýdi qorytyndylaǵan Sýma Chakrabartı Qazaqstannyń aımaqtary ishinde Shyǵys Qazaqstan EQQDB-men birlesken jobalardyń sany men somasy boıynsha kósh bastap turǵanyn jetkizdi.
Aıta keteıik, ústimizdegi jyldyń mamyr aıynda ótetin Astana ekonomıkalyq forýmy aıasynda EQQDB men Shyǵys Qazaqstan oblysy arasynda ınfrastrýktýralyq jobalar boıynsha kezekti nesıelik kelisimsharttarǵa qol qoıý josparlanýda.
