ShQO ákimi Tatarstannan kelgen dárigerlermen kezdesti
ÓSKEMEN. QazAqparat - Búgin Shyǵys Qazaqstan oblysynyń ákimi Danıal Ahmetov Tatarstan Respýblıkasynan kelgen dárigerlermen kezdesti, dep habarlaıdy QazAqparat óńir basshysynyń baspasóz qyzmetine silteme jasap.
Atalmysh dárigerler toby Óskemenge tájirıbe almasyp, koronavırýsqa shaldyqqan naýqastardy emdeýde kómektesýge kelgen.
12 adamnan turatyn toptyń ishine pýlmonolog, anestezıolog-reanımatolog, rentgenolog syndy mamandar jáne ınfektsııalyq aýrýhana dárigerleri men qyzmetkerleri kirgen.
Esterińizge sala ketsek, osy ýaqytqa deıin oblys ákimi Danıal Ahmetov Tatarstan Respýblıkasynyń Prezıdenti Rýstamom Mınnıhanovpen atalmysh másele boıynsha kelissóz júrgizgen.
– Shyǵys Qazaqstanda medıtsınanyń damýy úshin barlyq jaǵdaı jasalyp jatyr. Satyp alynǵan zamanaýı tehnıkalar iske qosylyp, turǵyndarǵa qyzmet kórsetip keledi. Qazirgi indettiń aldyn alý maqsatynda sizdermen tájirıbe almasyp, jaqsy kórsetkishke qol jetkizemiz degen senimdemin, – dedi Danıal Ahmetov.
Kelgen mamandar 2 kún aralyǵynda aýdan jáne qala aýrýhanalarynyń dárigerlerimen onlaın baılanysqa shyǵyp, keńes berip, jaǵdaımen tanysady. Keıinnen osy aı sońyna deıin ár aýdanǵa bóilinip, dárigerlerge kómektesetin bolady.
– Aımaqtaryńyzda koronavırýspen kúresý úshin ÓJJ, ottegi kontsentratorlary syndy jabdyqtar kóptep satyp alynypty. Bul durys sheshim. Jalpy eki eldiń qoldanyp otyrǵan ádis-tásilderi uqsas. Alaıda sonyń ózinde birlesip jańa tájirıbe jınaqtaımyz dep oılaımyn, – dedi kelgen toptyń jetekshisi, Tatarstan Respýblıkasy ortalyq klınıkalyq aýrýhanasy bas dárigeriniń birinshi orynbasary Marsel Mınnýlın.
