ShQO ákimi shetelge oqýǵa ketetin oqýshylardyń kóptigi týraly aıtty
ASTANA. QazAqparat - Shetelge ásirese Reseıge ketip jatqan oqýshylardyń kóptigi alańdatady. Bul týraly Shyǵys Qazaqstan oblysynyń ákimi Danıal Ahmetov aıtty, dep habarlaıdy «QazAqparat» HAA tilshisi.
«Meni mazalaıtyn máselelerdiń biri - bizdiń balalardyń Reseı Federatsııasynyń úzdik deýge kelmeıtin oqý oryndarynda oqýǵa qulshynys tanytýy. Álbette, eger qazaqstandyq stýdentter Anglııa men Frantsııanyń jetekshi ýnıversıtetterinde bilim alyp jatsa birsári. Biraq balalardyń ketip jatqan oqý oryndarynyń deńgeıi nemese bilim berý sapasy joǵary bolmasa, biz ol jastardyń bizde qalýyna qup kórer edik», - deıdi Danıal Ahmetov OKQ-da ótken baspasóz máslıhaty barysynda.
Ákim keltirgen derekterge súıensek, 2016 jyly Shyǵys Qazaqstannan 1800 bala RF eline oqýǵa ketken.
«Bıylǵy jyly tek onyń jartysy, ıaǵnı 900 balanyń ketkenin aıtyp ótkim keledi. Birinshiden, árıne, UBT ádistemesiniń ózgergeni qýantarlyq jaıt. Sonymen birge, biz stýdentterdi jumyspen qamtý, olardyń jumysqa ornalasýyna kepildik berý baǵytyndaǵy jumysqa den qoıa bastadyq. 200 grant bólip, sol jaqqa ketpek bolǵan balalardy alyp qaldyq. Aldaǵy ýaqytta oblystyq bıýdjet kózinen granttardyń mólsheri eki eselener degen úmittemiz. Osylaısha, úzdik oqýshylardy alyp qalarmyz degen oıdamyn», - deıdi ákim.
Óńir basshysy sóz sońynda nelikten bul baǵytta jumys júrgizilgenin shegeleı tústi.
«Álbette, eger MMÝ-ǵa (Máskeý memlekettik ýnıversıteti - avt.) bara jatsa bir jón. Biraq ol ketip bara jatqan oqý oryny bizdiń JOO-dan artyq bolmasa, onda jas qazaqstandyq óz elinde qalyp oqysyn», - deıdi Danıal Ahmetov.
