ShQO ákimi oqýshylardyń koronavırýs juqtyrý jaǵdaılaryna túsinik berdi
NUR-SULTAN. QazAqparat - Shyǵys Qazaqstan oblysynyń ákimi Danıal Ahmetov óńirdegi mektep oqýshylary koronavırýsty kóbine úı jaǵdaıynda juqtyrǵanyn aıtty, dep habarlaıdy QazAqparat tilshisi.
«Óńirde koronavırýs ınfektsııasynyń taralýyna baılanysty kúrdeli jaǵdaı saqtalyp otyr. COVID-19 alǵashqy oqıǵasy tirkelgen sátten bastap, 14 402 juqtyrý jaǵdaıy tirkeldi. Oblys aýrýhanalarynda búgin 659 adam jatyr. Aptasyna ortasha ósý qarqyny 1,7 paıyzdy quraıdy», - dedi ákim búgin Ortalyq kommýnıkatsııalar qyzmetindegi baspasóz máslıhatynda.
Sonymen qatar ol oqýshylardyń indetke shaldyǵý jaǵdaıyna qatysty toqtaldy.
«Ókinishke qaraı, oqý bastalǵannan beri oblysta oqýshylar arasynda koronavırýstyń 410 oqıǵasy tirkeldi. Onyń ishinde 291 oqýshy qashyqtan, 119 oqýshy 93 mektepte shtattyq rejımde oqydy. Іndet tabylǵannan keıin barlyq mektepter jabylyp, oqýshylar qashyqtan oqytýǵa aýystyryldy. Vırýs kóbinese úı jaǵdaıynda juqqan. Búgingi tańda oblys aýrýhanalarynda oqýshylar joq», - dedi Danıal Ahmetov.
Onyń aıtýynsha, tolyq medıtsınalyq jabdyqtalǵan 6,2 myń tósek-oryn daıyndaldy. Infektsııalyq bólimderdegi emdelýshiler oksıgenoterapııamen júz protsent qamtylǵan.
Aıta keteıik, Shyǵys Qazaqstan oblysy koronavırýs juqtyrý jaǵdaılary boıynsha «qyzyl aımaqqa» engen.
