ShQO ákimi koronavırýs boıynsha jaǵdaıdy turaqtandyrý qadamdaryn aıtty

NUR-SULTAN. QazAqparat – Búgin Ortalyq kommýnıkatsııalar qyzmetindegi baspasóz máslıhatynda Shyǵys Qazaqstan oblysy ákimi Danıal Ahmetov óńirde indet juqtyrýdyń táýliktik deńgeıi tómendep kele jatqanyn aıtty, dep habarlaıdy QazAqparat tilshisi.

Onyń aıtýynsha, qazirgi kezde Prezıdent tapsyrmasyn júzege asyrý boıynsha qajetti sharalar atqarylyp jatyr. Sondyqtan bul baǵyttaǵy jumystar táýlik boıy júrgizilýde. Qadaǵalaý maqsatynda kúnine birneshe márte shtab jıyny uıymdastyrylyp otyr.

Ákimniń sózine qaraǵanda, qazirgi kezde óńirde aýrýhana oryndaryn paıdalaný deńgeıi 17 paıyz shamasynda.

Baspasóz máslıhatynda oblys ákimine eki apta ishinde koronavırýs boıynsha ahýaldy turaqtandyrý týraly berilgen tapsyrma jóninde suraq qoıyldy.

«Bul turǵyda qoıylǵan maqsat oryndalatynyna senimdimin. Biz táýlik boıy jumys istep jatyrmyz. Osy oraıda keltirilgen derekter bizdiń dárigerler is-qımylynyń nátıjelerine jáne aýdan ákimdikteri tarapynan atqarylyp jatqan jumystarǵa súıene otyryp málim boldy», - dedi D. Ahmetov.

Eske sala keteıik, qarasha aıynyń basynda Shyǵys Qazaqstan oblysy koronavırýstyń taralý qarqyny boıynsha «qyzyl aımaqqa» kirdi.

Osy oraıda, 17 qarasha kúni ótken Vedomstvoaralyq komıssııanyń otyrysynda Memleket basshysynyń tapsyrmasy aıasynda COVID-19 taralýyna jol bermeý jóninde birqatar sheshim qabyldandy. Shyǵys Qazaqstan, Soltústik Qazaqstan oblystarynyń ákimdikterine on kúndik merzimde «qyzyl aımaqtan» shyǵý úshin túbegeıli sharalar qabyldaý tapsyryldy.