ShQO ákimi qala kóshelerin eski jarnamalardan tazartýdy tapsyrdy
ÓSKEMEN. QazAqparat - Óskemen jáne Semeı qalalarynyń ortalyq kósheleri kómeski ári qazirgi zamannyń talabyna saı kelmeıtin jarnamalyq bannerlerden tazartylatyn bolady. Búgingi ákimdiktiń keńeıtilgen otyrysynda ShQO ákimi Danıal Ahmetov osyndaı tapsyrma berdi, dep habarlaıdy «QazAqparat» HAA tilshisi ákimdiktiń baspasóz qyzmetine silteme jasap.
Túsi ońyp ketken, jyrtylǵan, mátini eskirgen jarnamalyq bannerler Óskemen jáne Semeı qalalarynyń kóshelerinen tazartylatyn boldy.
Aımaq basshysynyń aıtýynsha, mundaı jarnamalar qalanyń estetıkalyq kórkin buzyp, avtokólikter qozǵalysyna kedergi keltiredi.
«Bizdiń kóshelerimiz júzim sabaqtaryna uqsaıdy, ártúrli ári qazirgi zaman talaptaryna saı kelmeıtin jarnamalar jaǵalaı ornalasqan. Astana jáne Almaty qalalarynda kóshe jarnamalaryna áldeqashan tazartý júrgizilgen, sol jumysty biz óz óńirimizde jalǵastyramyz», - dedi Danıal Ahmetov.
Búgingi tańda oblysta 1600-den astam metall qurylǵylar ornatylyp, olardyń bir paıyzy bos turady. 80 paıyzy áleýmettik-saıası baǵyttaǵy bannerlerdi qamtysa, 19 - kommertsııalyq jarnamalar.
