ShQO ákimi eldi mekenderdiń ataýlaryn qazaqshalandyrýǵa qatysty pikir bildirdi

ASTANA. QazAqparat - Shyǵys Qazaqstan oblysynda jaqynda bir aýdannyń ataýy ózgeredi. Bul týraly OKQ-da ótken baspasóz máslıhaty barysynda ShQO ákimi Danıal Ahmetov málim etti, dep habarlaıdy «QazAqparat» HAA tilshisi.

Baspasóz máslıhaty barysynda oblys ákimine eldi mekenderdiń ataýyn qazaqshalandyrýǵa qatysty saýal qoıyldy.

«Osy jumysty asyqpaı qarastyryp jatyrmyz. Az ýaqyttyń ishinde bir aýdanǵa basqasha ataý beriledi. Biraq ta biz ulttyq másele - úlken másele ekenin bilýimiz kerek. Máselen, Shemonaıha aýdanynda halyqtyń 20 paıyzy qazaqtar bolsa, 80 paıyzy basqa ulttar. Sondyqtan, biz asyqpaı jumys isteýimiz kerek. Tek qana bir jaqqa basymdyq berýge bolmaıdy», - deıdi ol.
 

Danıal Ahmetov óz sózinde bul suraqtyń óziniń jerlesteri úshin de mańyzdy ekenin tilge tıek etti.

«Sózsiz, biz álbette onomastıkamen aınalysýymyz kerek. Iá, Glýbokoe aýdanynda birqatar ataýlar áli de oryssha. Shemonaıha aýdanynda da sondaı. Biraq, sol aýdandardyń múddelerin de eskerýimiz kerek qoı. Álbette, bizdiń birqatar eldi mekender óziniń tarıhı ataýlaryn qaıtarady. Bul Glýbokoe, Shemonaıha, Zyrıan aýdanynyń bárine qatysty. Biraq, sonymen birge biz bul iske shynaıylyqpen kelýimiz kerek. Sondyqtan, ataýlardy ózgertý máselesine biz bappen kelemiz», - deıdi oblys ákimi.