ShQO ákimi bıznes sýbektilerin óz aýmaqtaryn tazalaýǵa tartýdy tapsyrdy
ASTANA. QazAqparat - Shyǵys Qazaqstan oblysynyń ákimi Danıal Ahmetov Óskemendi qardan tazartý jóninde keńes barysynda shaǵyn jáne orta bıznes sýbektilerin ózderine qarasty aýmaqtaryn tazalaýǵa tartý kerektigin basa aıtty, dep habarlaıdy ákimsdiktiń baspasóz qyzmeti.
Oblystyq jáne qalalyq memlekettik mekemelerdiń basshylarynyń qatysýymen ótken keńeste aımaq basshysy Óskemen ákimdigine qar tazalaý jumystarynyń qarqynyn tómendetpeı, bekitilgen kelisim-sharttarǵa saı arnaıy tehnıkanyń táýlik boıy jumys isteýin uıymdastyrýdy tapsyrdy.
«Aldyn-ala belgilengen arnaıy tehnıka eki aýysymda jumys isteý kerek. Qalalyq kommýnaldyq qyzmetter jumysty óz kúshterimen uıymdastyrý kerek. Kóktaıǵaqqa aldyn-ala daıyndalyp, qajetti reagenttardy satyp alý qajet», - dedi óńir basshysy Danıal Ahmetov.
Odan soń Óskemendegi qardy tazalaýǵa jumyldyrylǵan oblystyq kásiporyndardyń bosatylýyna oraı qalalyq kommýnaldyq mekemeniń jáne onyń merdiger kompanııalarynyń jumysyn tekserý tapsyryldy. Oblys ákiminiń birinshi orynbasary Nurymbet Saqtaǵanov kúnine úsh ret, onyń ishinde túngi saǵat úshte qalalyq arnaıy tehnıkalardyń sany men jumysyn baqylaýǵa alady.
Oblys ákimi kóńil aýdarǵan basty másele - kásipkerlerdi ózderine qarasty aýmaqtaryn tazalaýǵa tartý boldy. Shaǵyn jáne orta bıznes sýbektilerimen jumysty uıymdastyrýmen qatar, qalalyq ákimdik páter ıeleri kooperatıvteriniń tóraǵalarymen arnaıy keńes ótkizip, olardyń kópqabatty úılerdiń aýlalaryndaǵy qardy jedeldetip tazalaýyn uıymdastyrý qajet.
