ShQO ákimi aımaqta jetispeıtin mamandyqtar úshin 467 grant bóldi
ÓSKEMEN. QazAqparat - Shyǵys Qazaqstan óńirine asa qajet mamandardy daıarlaýǵa oblys bıýdjetinen 400 grant bólinbek. Ol úshin talapker 50 bal jınasa da jetkilikti, dep habarlaıdy QazAqparat tilshisi.
Atalmysh 400 granttyń syrtynda 67 bıýdjettik oryn jáne bar. Oblys ákiminiń orynbasary Ásem Núsipovanyń aıtýynsha, bul bıýdjettik oryndar 3 joǵary oqý ornyna berilmek. Atap aıtqanda, ál-Farabı atyndaǵy QazUÝ «Arheologııa jáne etnologııa» mamandyǵyna - 10 oryn, «Mýzeı isi jáne eskertkishterdi qorǵaý» mamandyǵyna - 5 oryn qarastyrylǵan. Jergilikti S.Amanjolov atyndaǵy ShQMÝ-dyń «Saýyqtyrý jáne dene shynyqtyrý» mamandyǵyna - 10 oryn, «Tirshilik qaýipsizdigi jáne qorshaǵan ortany qorǵaý» mamandyǵyna - 5 oryn bólingen. Al D.Serikbaev atyndaǵy ShQMTÝ-ǵa 37 oryn bólinip otyr. Onyń 20-sy - «Metallýrgııa» mamandyǵyna, 10-y - «Avtomattandyrý jáne basqarý» mamandyǵyna, jeteýi - «Tehnıkalyq fızıka» mamandyǵyna baǵyttalǵan.
Eń bastysy, Qazaq Ulttyq ýnıversıtetine túskisi kelgen talapkerdiń UBT sertıfıkatyndaǵy ball mólsheri 65-ten kem bolmaýy tıis. Al jergilikti qos ýnıversıtettiń bıýdjettik ornyna túsý úshin 50 baldan joǵary jınasa, jetip jatyr. Atalmysh grant ıeleriniń esimi 11-15 tamyz aralyǵynda ótetin komıssıııa otyrysynan keıin belgili bolmaq. Qujat qabyldaý merzimi 5 tamyzdan 10 tamyzǵa deıin uzartylyp otyr.
«Ótken jyly bizdiń oblystan 890 túlek shet memleketke oqýǵa ketken. 90 paıyzy Reseıdi tańdady. Onda da Máskeý men Sankt-Peterbýrgti tańdaǵandar tym az. Kóbi Tom, Novosibir qalalaryna túsken. Biz qosymsha granttar bólý arqyly osy tendentsııany toqtatsaq deımiz. Eń bastysy, osy grant arqyly oqyǵan túlekterge jumys orny daıyn tur», - deıdi Ásem Núsipova.
Qazirgi tańda Shyǵys Qazaqstanǵa 1304 joǵary bilimdi maman qajet. Joǵaryda atalǵan grantqa ıe bolǵysy kelgender osy úsh ýnıversıtettiń qabyldaý komıssııalaryna júginýi shart.
