ShQO ákimi aılyǵyn mektepterdi jaraqtandyrýǵa arnalǵan qorǵa aýdarmaq

ASTANA. QazAqparat - Shyǵys Qazaqstan oblysynyń ákimi Danıal Ahmetov óńirindegi «Meniń mektebim» jobasy úshin ashylǵan «Paryz» qoryna bir aılyq eńbekaqysyn aýdarmaq, dep habarlaıdy «QazAqparat» HAA tilshisi ShQO ákiminiń baspasóz qyzmetine silteme jasap.

«Meniń mektebim» jobasy «Rýhanı jańǵyrý» baǵdarlamasy aıasynda Shyǵys Qazaqstanda qolǵa alynǵan bolatyn. Tyń joba aıasynda aımaqtaǵy barlyq mektepti zamannyń ozyq bıologııa, hımııa, fızıka jáne robototehnıka kabınetterimen jabdyqtaý kózdelip otyr. Oblys ákimdigi osy maqsatta jýyqta «Týǵan jer» atty kásipkerler forýmyn ótkizip, óńirdegi qaltaly azamattardyń arqasynda «Paryz» qoryna 2 mlrd 300 mln teńge jınalǵan edi.

Igi jobaǵa oblys ákimi Danıal Ahmetov ta bir kisideı at salysyp, bir aılyq eńbekaqysyn «Paryz» qoryna aýdaratynyn aıtyp ótti. Barlyq jınalǵan qarajatqa mektep kabınetterine zamannyń úzdik tehnologııalary satyp alynatyn bolady.