ShQO ákimdigi kómir baǵasyna qatysty túsinikteme berdi
Ótken qysta kómir tapshylyǵynan zardap shekken oblys turǵyndary bıyl jaz kezinde qamdanǵan bolatyn. Turǵyndardyń bul tilegine «Qarajyra» aktsıonerlik qoǵamy da qulaq asyp, tapsyrysty mamyrdan beri qabyldap jatyr. Kómirdi jazda da alýǵa bolatynyn estigen el búginde ony bosatatyn oryndarda saǵattap kezek kútýde. Sol kezekti seıiltý úshin oblystyq turǵyn úı-kommýnaldyq sharýashylyq basqarmasy men «Qazaqstan Temir joly» kompanııasy kún saıyn Qarajyra kenishinen kómir tasıtyn vagondardyń sanyn 2 ese arttyrdy. Kezek seıilgenmen, jurttyń kóńilindegi baǵa saıasatyna qatysty kúdik seıilmeı tur. Qazir áleýmettik jelide Óskemenniń túbinde ár tonnasy 8000 teńgeden bosatylatyn kómirdi alypsatarlar 17 myń teńgege deıin kóterip jibergeni týraly aqparattar kóptep tarap jatyr. Murat Musataev jýrnalısterge ondaı baǵanyń qaıdan paıda bolǵanyn túsindirdi.
«Semeı Qarajyra kenishine jaqyn. Sondyqtan onda kómir baǵasy Óskemennen arzan. Al Óskemende bir tonna kómirdi 8800 teńgeden satýda. Úrjar, Tarbaǵataı, Zaısan sııaqty shalǵaı aýdandarǵa kómir tasymal aqysy qosylyp, áldeqaıda qymbatqa jetkizilip jatyr. Áıtpese, kómirdiń óz baǵasy naqty belgilengen. Bizdiń basqarma tarapynan kómir bosatatyn oryndarǵa kún saıyn mamandar shyǵyp, jaǵdaıdy monıtorıngtep otyr» - dedi ol.
Kómir baǵasy qatań qadaǵalaýǵa alynǵanymen, ony tasymaldaý aqysy rettelmeı jatyr. BAQ ókilderi tarapynan Óskemenniń irgesindegi Tarhanka aýylyna kómir tasymaldaý úshin 25 000 teńge suraǵan oqıǵalar bolǵany aıtyldy.
«Bizdiń basqarma kómir baǵasyn qadaǵalýǵa ǵana quqyly. Degenmen, tabıǵı monopolııalardy retteý departamentine usynyspen shyqtyq. Olarǵa kómirdi árbir aýdanǵa jetkizýdiń shyǵyn mólsherin bekitýdi usyndyq. Qazir osy baǵytta jumystar júrip jatyr. Kómir tasymaldaýshylar shaǵyn bıznes ókiline jatatyndyqtan, olarǵa tikeleı nusqaý berip, jumysyn shekteı almaımyz. Bul rette turǵyndar da biraýyzdylyq tanytyp, baǵa saıasatyna tutynýshy retinde áser etýi tıis» - dedi basqarma basshysy.
Murat Musataev byltyrǵy kómir qarbalasynyń daqpyrty bıyl da qoldan qymbatshylyq jasaýy múmkin ekenin eskertti.
«Bıyl kómirdi jaz bastalǵaly tasyp jatyrmyz. Sondyqtan byltyrǵydaı tapshylyq bolmaıdy. Kómir jetpeı qalady eken dep, kóringen baǵaǵa kelise bermeýge keńes beremin. «Bıyl da kómir jetpeı jatyr» degenge saıatyn jalǵan aqparat qoldan qymbatshylyq jasaýshylarǵa jol ashyp berdi. Ondaı negizsiz baıbalamǵa boı urmaý qajet. Kómir barlyq turǵyndarǵa jetedi. Al onyń baǵasy 8800 teńgeden qymbattamaıdy. Muny men resmı túrde málimdeımin» - dedi basqarma ókili.
