ShQO agrarshylary 73 aýylsharýashylyq kooperatıvine birikti
ÓSKEMEN. QazAqparat - Shyǵys Qazaqstan oblysynda 73 aýylsharýashylyq kooperatıvi jumysyn bastady. Sharýalar etti qaıta óńdeý, balyq ósirý, ara sharýashylyǵy jáne ósimdik sharýashylyǵy boıynsha sharýashylyqtarǵa toǵysty.
Bul týraly búgin halyq aldynda esep bergen Shyǵys Qazaqstan oblysynyń ákimi Danıal Ahmetov málim etti.
«Shyǵysqazaqstandyqtardyń 40 paıyzy aýyldy jerde turady. Olardyń ál-aýqatyn jaqsartý - oblys basshylyǵy úshin basymdy mindet bolyp tabylady. Ózin-ózi asyraýshylardy aýylsharýashylyq kooperatıvterine biriktirý sheteldik tájirıbege negizdelgen osy baǵyttaǵy ońdy qadam», - dedi ol.
D. Ahmetovtiń aıtýynsha, ShQO-da aýylsharýashylyq kooperatıvterine shoǵyrlaný jóninde júrgizilgen uıymdastyrý-túsindirý jumystary óz jemisterin bere bastady. Aımaq turǵyndary 73 kooperatıvke birikse, olardyń 47-i etti qaıta óńdeý, 5-i balyq ósirý men ara sharýashylyǵy, 16 ósimdik sharýashylyǵy baǵyttaryna jatady. Olardyń árqaısysyna 20-dan kem emes qatysýshy kiredi. Birigý aýyl turǵyndaryna qosymsha sýbsıdııalar alýǵa, qural-jabdyqqa ketken qarajattyń 50 paıyzyn qaıtaryp alýǵa, óz ónimderin saýdalaıtyn naryqty keńeıtýge múmkindik beredi. Zaýyttar kún saıyn bir jerden belgilengen baǵa boıynsha sútti alyp ketý úshin kólik jiberýge daıyn. Bul sharýalarǵa óte tıimdi. Kooperatıv múshelerine ózindik baǵasy boıynsha taratylatyn azyq satyp alýǵa bolady, veterınarlyq qyzmetter únemi kórsetilip turady, qoldan uryqtandyrý múmkindigi týady, óıtkeni, kooperatıv iri kásiporyn dep sanalady da, selektsııalyq jumystardy júrgizýdiń maǵynasy bolady. Kooperatıv erikti túrde kirýge, demokratııalyq basqarýǵa negizdelgen.
«Jyl aıaǵynda sútti óndirý, satyp alý jáne qaıta óńdeý boıynsha 12 qanatqaqty kooperatıv qurý josparlanǵan. Shyǵys Qazaqstan oblysynyń sút zaýyttary men et óńdeý kásiporyndarynyń qýaty qaıta óńdeýdi 35 paıyzdan 105 myń tonna sút pen 20 myń tonna etke deıin arttyrady. Demek, turǵyndardyń ónimderin satatyn naryqtyń sheńberi artady, ıaǵnı, kiristeri áldeqaıda kóbeıedi degen sóz», - dep atap ótti Danıal Ahmetov.
Aıta keterligi, ShQO-da et óndirý 5,8 paıyzǵa, sút óndirý 5,9 paıyzǵa, jumyrtqa óndirý 1,9 paıyzǵa artty. Sút óndirý kóleminiń úles salmaǵy boıynsha oblys respýblıkada birinshi orynda, etten - ekinshi, jumyrtqadan - toǵyzynsha orynda tur.
