ShQO Abaı aýdanynda tamyzda Muhtar Áýezovtyń 120 jyldyǵy atalyp ótedi
ASTANA. QazAqparat - Tamyz aıynyń 25-shi juldyzynda Shyǵys Qazaqstan oblysy Abaı aýdanynyń Qaraýyl aýylynda zańǵar jazýshy Muhtar Áýezovtyń týǵanyna 120 jyl tolýyna oraı aýqymdy sharalar legi ótedi. Shara aıasynda Qunanbaı qajynyń eskertkishi ashylyp, «Qalamqas» halyqtyq án-bı ansambliniń 45 jyldyǵy toılanady, dep habarlaıdy «QazAqparat» HAA tilshisi.
Muhtar Áýezovtyń týǵan kúni qyrkúıek aıynda bolǵanymen, Abaı aýdanynyń ákimdigi sharany bir aı buryn ótkizýdi josparlap otyr. Jazýshynyń mereıtoıyna tuspa-tus bir kezderi odaqqa tanylǵan «Qalamqas» halyqtyq án-bı ansambliniń qurylǵanyna bıyl 45 jyl tolǵan. Keńestik kezeńde Máskeýge deıin baryp, Chehoslovakııa elderinde tanylǵan ansambl qazir de jyl saıyn Qazaqstannyń iri qalalarynda kontsert ótkizip júr. Ataq-abyroıy asqaqtaǵan óner ujymy týrasynda buryn «Qalada - Dosmuqasan, Aýylda - Qalamqas» degen de sóz qalǵan eken.
Mereıtoıǵa tuspa-tus Abaı aýdanynyń ortalyǵy Qaraýyl aýylynda qyrkúıek aıyna deıin Qunanbaı qajyǵa eskertkish ornatylmaq. Eskertkish ıdeıasynyń avtory Ardaq Belibaev osy maqsatta arnaıy Qor qurǵan. Músinniń bıiktigi - 4, eni - 2 metr bolady. Músinniń negizgi qalyby Almatyda temirden jasalyp, eskertkish soǵylatyn mys Balqash qalasynan ákelingen. Ótken jyly rejısser Doshan Joljaqsynovtyń «Qunanbaı» fılmi kórermen qaýymǵa jol tartqannan keıin jergilikti halyq qajyǵa eskertkish ornatý bastamasyn kótergen.
«Muhtar Áýezovtyń týǵanyna 120 tolýyna oraı, elimizdiń iri shaharlarynyń beldi aqyn-jazýshylaryn shaqyrýdy josparlap otyrmyz. Shara aıasynda aýqymdy deńgeıde alaman báıge ótedi. «Qalamqas» halyqtyq án-bı ansambli jınalǵan jurtshylyqty ónerine tánti etetin bolady», - dep habarlaıdy Abaı aýdanynyń ákimdiginen.
